दमक/ दमकमा यसअघि सामान्य सेवा दिँदै आएको एडभान्स मल्टिस्पेशालिटी हस्पिटलले नयाँ व्यवस्थापनसहित विशेषज्ञ सेवा शुरु गरेको छ ।
विर्तासिटी अस्पताल विर्तामोडले दमकमा सञ्चालनमा ल्याएको एड्भान्स मल्टिस्पेशालिटी अस्पालले न्यूरो समस्याको उपचार सम्बन्धी विशेषज्ञ सेवा विस्तार गरेको हो ।
दमक आसपासका विरामीलाई लक्षित गरेर अस्पतालले २४ सै घण्टा न्युरो सम्बन्धि विशेष स्वास्थ्य सेवा सञ्चालनमा ल्याईएको अस्पतालका सञ्चालक तथा मेडिकल डाईरेक्टर डाक्टर अनिल बस्नेतले बताए ।
अस्पतालका सञ्चालकहरुले दमक क्षेत्रमा देखिएको स्वास्थ्य समस्यालाई हल गर्न पहिलोपटक यस किसिमको विशेषज्ञ सेवा विस्तार गरिएको जनाएका छन् । अस्पतालले आफ्नो सेवाबारे सर्वसाधारणलाई जानकारी गराउने उद्धेश्यले गत बुधबार एक दिन निशुल्क विशेषज्ञ स्वास्थ्य शिविर समेत सञ्चालन गरेको छ । शिविरमा हाडर्जाेनी, नशा, फिजिसियन, बाल रोग सम्बन्धी जाँच सेवा निशुल्क दिइएको थियो भने सिटी स्क्यान सेवामा २० प्रतिशत र ल्याब सेवामा ३० प्रतिशत छुट सुविधा दिइएको थियो ।
अस्पतालका मेडिकल डाइरेक्टर डा. बस्नेतका अनुसार न्यूरो सम्बन्धी समस्या भएका दमक र यस आसपासका क्षेत्रका नागरिकको सेवालाई मध्यनजर गर्दै दमकमा पहिलो पटक यस किसिमको शल्यक्रियासहितको सेवा दिन थालिएको हो ।
अब यो क्षेत्रबाट न्यूरो सेवाका लागि बाहिर जानु पर्देन हामीले एडभान्स अस्पतालमा नै यो सेवा सुचारु गरेका हौं– डा. बस्नेतले भने ।
दमकमा सरकारी , सामुदायिक र निजी अस्पतालहरुको संख्या धेरे भए पनि न्यूरो सम्बन्धिको समस्यामा बिर्तामोड, विराटनगर, सिलिगुढी लगायतका ठाउँमा रेफर गर्नुपर्ने बाध्यता थियो ।
उनले विशेषज्ञ सहित सुबिधायुक्त प्रविधिको प्रयोगबाट न्यूरो शल्यक्रिया समेत शुरु गरिएको र हाल सम्म तीन जनाले न्युरो उपचार सेवा पाइसकेका जानकारी दिए ।
बिर्तासिटी अस्पतालले करिब एक बर्ष भित्रै दमकमा आफ्नो अस्पताल पनि सञ्चालनमा ल्याउन लागेको छ । दमक ५ स्थित पाथीभरा चलचित्र भवन नजिकै सो अस्पतालका लागि आवश्यक भौतिक पूर्वाधार निर्माणाधिन अवस्थामा छ ।
सो अस्पताल सञ्चालनमा आएपछि यहाँ एमआरआइ सेवासहित गुणस्तरिय सेवा दिने लक्ष्य लिइएको अस्पतालले जनाएको छ । विर्तामोडस्थित विर्तासिटी २०७० सालदेखि सञ्चालनमा छ ।
