दमक/ कोशी प्रदेशको पहिलो “कोशी घुम्ती अस्पताल” झापाको कमलमा उदघाटन गरिएको छ । शुक्रबार कोशी प्रदेशका मुख्यमन्त्री हिक्मत कुमार कार्कीले कमल २ स्थित कमल नगर अस्पतालमा सो घुम्ती अस्पतालको उदघाटन गरेका हुन् ।
स्वास्थ्य सेवाको पहुँचबाट टाढा रहेका ग्रामीण तथा अर्ध–शहरी समुदायलाई लक्षित गरेर प्रदेश सरकारले सो कार्यक्रम सञ्चालनमा ल्याएको मुख्यमन्त्री कार्कीले उल्लेख गरे ।
नेपालकै ईतिहासमा पहिलो घुम्ती अस्पताल आफ्नै निर्वाचन क्षेत्र कमल गाउँपालिकाबाट सुरु गरिएको बताउँदै उनले दिर्घकालीन रुपमा सञ्चालन गर्न मन्त्रालयका कर्मचारीलाई निर्देशन दिए ।
गाउँगाउँमा सहज रुपमा स्वास्थ्य सेवा पुर्याउने उद्धेश्यले सञ्चालनमा ल्याएको घुम्ती अस्पतालबाट नागरिकलाई सहज रुपमा सेवा उपलब्ध हुने र यस्ता कार्यक्रममलाई साथ र सहयोग गर्नुपर्ने स्वास्थ्य मन्त्री मान बहादुर लिम्बुले बताए ।
कमल गाउँपालिका अध्यक्ष हुकुमसिंह राईले कोशी प्रदेश सरकार द्वारा सञ्चालनमा ल्याइएको पहिलो घुम्ती अस्पताल कमल गाउँपालिका बाट सुरु गरेकोमा कोशी प्रदेश सरकारलाई धन्यवाद दिदैं घुम्ती अस्पताल कार्यक्रम मार्फत कमल गाउँपालिकाका नागरिकले विशेषज्ञ डाक्टर बाट सेवा पाएकोमा धन्यवाद दिए ।
सो अवसरमा स्वास्थ्य जाँच अन्तर्गत पिसाब परीक्षण, मधुमेह (सुगर) जाँच, थाइराइड जाँच,मुटु सम्बन्धी परीक्षण,इसिजी (मुटुको भिडियो एक्स–रे),हड्डी तथा नसासम्बन्धी रोगको जाँच तथा विशेषज्ञ परामर्श र आवश्यक औषधि निःशुल्क वितरण गरिएको थियो ।
कार्यक्रमा स्वास्थ्य निर्देशनालय कोशीका निर्देशक ज्ञान बहादुर बस्नेत, जिल्ला समन्वय समिती झापाका प्रमुख विश्वनाथ बराल, झापाका प्रमुख जिल्ला अधिकारी शिवराम गेलाल, कोशी प्रदेश स्वास्थ्य मन्त्रालयका सचिव यदुचन्द्र घिमिरे, विशेषज्ञ चिकित्सक, जनप्रतिनिधी, सेवाग्राही सर्वसाधारणको उल्लेखीय उपस्थिती रहेको कमल नगर अस्पतालका प्रमुख दिपक दाहालले जानकारी दिए ।
