दमक/ दमक ५ स्थित मेची सेकेण्ड्री बोर्डिङ स्कूलले ३७ औं बार्षिक कार्यक्रम अन्तर्गत साँस्कृतिक कार्यक्रम तथा पुरस्कार वितरण गरेको छ ।
बिद्यालयले अभिभावकहरुको उल्लेखीय उपस्थितीमा शुक्रबार सो कार्यक्रम सम्पन्न गरेको हो । बिद्यालयका संस्थापक एवं व्यवस्थापज समिति अध्यक्ष शेरबहादुर भट्टराईको प्रमुख आतिथ्यमा सम्पन्न कार्यक्रममा बिद्यालयको आन्तरिक अतिरिक्त क्रियाकलापमा यो बर्ष उत्कृष्टता हासिल गर्ने दुई सय बिद्यार्थीहरुलाई पुरस्कार तथा मेडल प्रदान गरिएको छ ।
बिद्यालयका प्रिन्सीपल श्रवणकुमार पोखरेलको सभापतित्वमा सञ्चालन भएको कार्यक्रममा महिला शिक्षकहरु, बिद्यार्थीहरु र अभिभावकहरुले विभिन्न गीतमा आकर्षक नृत्य, गायन आदि कला प्रस्तुत गरेका थिए ।
बालबालिकाहरुको प्रतिभा उजागर गर्दै अतिरिक्त प्रतिभा बिकासमा योगदान दिने उद्धेश्यले बर्षेनी सञ्चालन गरिँदै आएको यस किसिमका कार्यक्रमलाई यो बर्ष पनि निरन्तरता दिइएको हो ।
सो अवसरमा बालबालिकाको शैक्षिक बिकासमा योगदान दिने गौरादह १ स्थित हेप्पी फाउण्डेशनका तिलक बिकसहित सो संस्थाकी संस्थापक जर्मनी नागरिकसहित विभिन्न व्यक्तित्वहरुलाई विशेष सम्मानसहित उपहार प्रदान गरिएको थियो । सो अवसरमा प्रमुख अतिथी भट्टराई र प्रिन्सीपल पोखरेलले उनीहरुलाई सम्मान गरे ।
सोही अवसरमा बिद्यार्थीहरुलाई बिद्यालयका सञ्चालक समिति, अभिभावक संघ लगायतका प्रतिनिधिहरु सुमित्रा प्रसाइँ, सरस्वता बराल, सुमित्रा भण्डारी दंगाल लगायतले पनि बिद्यार्थीहरुलाई मेडल हस्तान्तरण गरेका थिए । बिद्यालयका प्रिन्सीपल पोखरेलले सबैको सामुहिक प्रयासबाट मेची बोर्डिङ स्कूलले आफ्नो गौरवमय इतिहासलाई कायम राख्न सफल भएको बताउँदै आगामी दिनमा पनि निरन्तर सहयोग र सहकार्यको अपेक्षा राखिएको बताए । कार्यक्रममा अभिभावकहरुको तर्फबाट लोकनाथ सिग्देलले शुभकामना मन्तव्य राखेका थिए ।
बिद्यालयका शिक्षक होमराज खतिवडाले स्वागत मन्तव्य राखेको सो कार्यक्रम शिक्षकहरु निस्मा श्रेष्ठ, किनारा तिम्सिना र हरिभक्त सुवेदीले कार्यक्रम आलोपालो सञ्चालन गरेका थिए ।
