दमक/ झापाको कमल २ मा सञ्चालित कमल नगर अस्पतालले वडा नम्बर ७ मा बृहत निशुल्क विशेषज्ञ स्वास्थ्य सेवा प्रदान गर्ने उद्धेश्यले स्वास्थ्य शिविर सम्पन्न गरेको छ ।
कमल गाउँपालिकाको सबै क्षेत्रमा सन्तुलित रुपमा स्वास्थ्य सेवा प्रवाह गर्ने गाउँपालिकाको नीति अनुरुप अस्पतालको दोश्रो बार्षिकोत्सवको सन्दर्भ पारेर निःशुल्क विशेषज्ञ स्वास्थ्य सेवासहितको शिविर बिहिबार सम्पन्न गरिएको हो ।
सिंहदेवी आधारभूत विद्यालय विष्णुकट्टामा सम्पन्न निःशुल्क शिविरमा ४१२ जनाले विभिन्न विशेषज्ञ स्वास्थ्य सेवाहरूको निःशुल्क लाभ लिएका छन्।
अस्पताल सञ्चालन तथा व्यवस्थापन समितिका अध्यक्ष समेत रहेका गाउँपालिका अध्यक्ष हुकुम सिंह राईको अध्यक्षतामा सञ्चालित शिविरमा सो क्षेत्रका सर्वसाधारणहरु उत्साहजनक रुपमा सहभागी भएका अध्यक्ष राईले यस किसिमका विशेषज्ञ सेवासहितको शिविरले स्वास्थ्यप्रति सचेतना अभिवृद्धि गर्न महत्वपूर्ण भूमिका खेलेको उल्लेख गरे ।
शिविरमा आम्दा अस्पतालका स्त्रीरोग विशेषज्ञ डा. राजु साह, हाडजोर्नी विशेषज्ञ डा. अरुण साह, मेडिकल अफिसरहरु डा. नारायण नेपाल, डा. राजेश सिंह, आमा डेन्टलका डा. संगीता बराल, मेची आखाँका बरिष्ठ नेत्र अधिकृत होमप्रसाद धितालसहितको स्वास्थ्यकर्मीहरुले प्राविधिक सहयोग पुरयाँएका कमल नगर अस्पतालका कार्यालय प्रमुख दिपक दाहालले जानकारी दिए ।
।
सोहि शिविरमा आँखा जाँच गरेका मध्ये १८ जनामा मोतिया विन्दु देखिएका र विहिबारनै ५ जनालाई शल्यक्रियाका लागि पठाईएको अस्पतालका कार्यालय प्रमुख दाहालले बताए ।
शिविरमा पालिका उपाध्यक्ष प्रमिला न्यौपाने, कमल ७ का वडाअध्यक्ष पृथीपति राई, सिंहदेवी स्कूल व्यवस्थापन समितिका अध्यक्ष सन्तोष राई,रेडक्रस सभापति चन्द्र साह ,सचिव पारसमणि राई, स्वास्थ्य शाखा प्रमुख बिमल थापा लगायतको उपस्थिति रहेको थियो ।
नेपाल पोषण तथा आहार विज्ञान विद्यार्थी समाज र नेपाल रेडक्रस सोसाइटी कमल उपशाखाको प्राविधिक समन्वयमा विभिन्न सेवाहरू सञ्चालन गरिएको कमल नगर अस्पतालका कार्यालय प्रमुख दाहालले जानकारी दिए ।
उनका अनुसार शिविरमा फिजिसियन तथा हाडजोर्नी विशेषज्ञ सेवा १०४ जनाले लिएका छन् । त्यस्तै आँखा परीक्षण सेवा २१२ जनाले लिएका छन भने दन्त परीक्षण सेवा ८८ जनाले लिएका छन् । त्यस्तै स्त्रीरोग तथा प्रसूति सेवा तथा पाठेघरको मुखको क्यान्सर स्क्रिनिङ सेवा २७ जनाले लिएका छन् । सोही अवसरमा पोषण लेखाजोखा तथा परामर्श सेवा प्रदान गरिएको छ ।
शिविरमा अध्यक्ष राईले कमल ६ र ७ का अपाङ्गता भएका व्यक्तिहरूलाई सहायक सामग्री वितरण समेत गरेका छन् ।
शिविरमा आवश्यक औषधिहरूको व्यवस्थापन नेपाल मेडिकल एण्ड सेल्स रिप्रेजेन्टेटिभ एसोसिएसन र स्थानीय जीवन सापकोटाले गरेका थिए ।
कमल नगर अस्पतालले यसअघि गत फागुन १ मा अस्पताल परिसरमा सो क्षेत्रका सर्वसाधारणलाई लक्षित गर्दै निशुल्क शिविर सञ्चालन गरेको थियो ।
