दमक/ झापाको कमल गाउँपालिकाले पालिका भित्रका मुख्य चोकहरुमा पोलसहितको सडक बत्ती जडान गर्ने कामलाई निरन्तरता दिएको छ ।
यसअघि पाडाजुँगी –गोरीगञ्ज सडक खण्डमा चार लेन सडक विस्तारसँगै सडक सौन्दर्यकरण र सडक बत्ती जडान गरेको पालिकाले बिहिबार सो गाउँपालिका अन्तर्गतका विभिन्न चार स्थानमा दुई मुखे र तीन मुखे सडक बत्ती जडान गरेको हो ।
गाउँपालिका अध्यक्ष हुकुमसिंह राईले मंगलबारे–पाराबारी–शिवगञ्ज सडक खण्ड अन्तर्गतको कमल ४ स्थित पुल्चोकमा सडक बत्ती जडान गरेर सोको शुरुवात गरे । त्यस अवसरमा अध्यक्ष राईले पालिका भित्रका चोक बजार तथा शहरीकरण तर्फ उन्मुख क्षेत्रमा सडक बत्ती जडान गर्ने कार्यलाई आवश्यकताका आधारमा विस्तार गर्दै लैजाने योजना रहेको बताए ।
पुलचोकमा सडक बत्ती जडानपछि स्थानीयहरुले सडक बत्ती जडानले सो क्षेत्रमा हुन सक्ने आपराधिक क्रियाकलापको जोखिमलाई कम गर्दै गाउँ टोलको सौन्दर्यकरणमा समेत मद्धत पुग्ने प्रतिक्रिया दिएका छन् । उनीहरुले त्यस क्षेत्रमा यसअघि टड्कारो आवश्यकताका रुपमा रहेको पूलको आवश्यकता पुरा गरिदिएकोमा खुशी व्यक्त गरे ।
त्यहाँको मुख्य सडक स्तरोन्नतीको काम शुरुवात भएकोले सडक निर्माणको गुणस्तरमा चासो र सक्रियता देखाउन स्थानीयबासीहरुसँग आग्रह गरे । स्थानीयहरुले त्यहाँस्थित भित्री सडकको स्तरोन्नतीका लागि पनि अध्यक्ष राईलाई ध्यानाकर्षण गराएका छन् । अध्यक्ष राईले त्यहाँको करिब डेढ सय मिटर लामो भित्री सडक स्तरोन्नती गर्नुपर्ने आवश्यकताबारे आफू जानकार भएकाले गाउँपालिका सबै क्षेत्रको सन्तुलित बिकास गर्ने लक्ष्यसहित अघि बढेको प्रष्ट्याए ।
बिहिबारनै कमल ५ धनप्रसाद मार्गस्थित गेउरिया पुलमा , कमल ६ को काँटा चोक, कमल ७ को गेउररिया बजारमा आज सडक बत्ती जडान गरिएको छ ।
जडान गरिएका सडक बत्ती बले वापत उठेको बिद्युत महसुल सम्बन्धित क्षेत्रका स्थानीयबासीहरुले समयमानै तिरेर नागरिकको दायित्व पुरा गर्न गाउँपालिकाले अनुरोध गरेको छ । बत्ती जडानपछि त्यहाँ कुनै पनि समस्या देखिए तत्काल स्थानीय सरकारमा जानकारी गराए आवश्यक मर्मत सम्भारको काम भने पालिकालेनै गर्ने जनाइएको छ ।
