विराटनगरमा जारी ३८ औं विराट गोल्डकप फुटबल प्रतियोगितामा पूर्वविजेता टोली झापा ११ फाइनलमा प्रवेश गरेको छ। बुधबार राति सहिद रंगशालामा भएको खेलमा विभागीय टोली नेपाल पुलिस क्लबलाई १–० गोलमा पराजित गर्दै फाइनलमा पुगेको हो।
बिहीबार (आज) राति घरेलु टोली विराटनगरको सम्राट स्पोर्टिङ क्लब र काठमाडौंको चर्च ब्वाइज युनाइटेडबीचको विजेतासँग उपाधि जितका लागि वैशाख ५ गते खेल्ने छ। खेलको पहिलो हाफ गोलरहित बराबरीमा सकिएको थियो। सुरुवाती समयदेखि नै पुलिसले झापामाथि दबाब बनाए पनि पाएका आधा दर्जनभन्दा बढी अवसरलाई सदुपयोग गर्न नसक्दा १० वर्षअघिको जितलाई कायम गर्न सकेन। झापा र पुलिस विराट गोल्डकपको पूर्वविजेता टोली हुन्। यिनहरु बीच यहीँ गोल्डकपमा २०७२ सालको फाइनल खेलमा भेटे हुँदा पुलिसले झापालाई १–० गोलमा हराउँदै उपाधि जितेको थियो। १० वर्षपछि सेमिफाइनलमा भेट हुँदा पुरोना गोलसंख्यमा झापाले बदला लिँदै पुलिसलाई फाइनल खेलमा जान रोक्न सफल भयो।
प्रतिस्पर्धात्मक खेलको दोस्रो हाफमा झापाले अग्रता लिएको थियो। खेलको ६७ औं मिनेटमा झापाका फागुराम थारुले गरेको गोल नै निर्णायक बन्यो। उनले ‘सेकेन्ड बार’ च्यापेर गरेको कडा प्रहारले जाली चुमाउँदा झापाको जित सुनिश्चित भएको थियो। खेलको प्लेयर अफ द म्याच झापाका स्वलोमन किङले ११ हजार रुपैयाँ पुरस्कार प्राप्त गरे ।
