चुलाचुली/ इलामको चुलाचुली गाउँपालिकाले बहुप्रतीक्षित मधुमल्ला–साकफारा–चुली सडक निर्माणका लागि विस्तृत परियोजना प्रतिवेदन (डीपीआर) तयार गरी बजेट सुनिश्चित गर्न औपचारिक पहल थालेको छ ।
इलामको साकफारा–दारेगौंडा–फुङनाम–चुली हुँदै मोरङको मधुमल्ला, उर्लाबारी र दमकसम्म जोड्ने महत्वपूर्ण सडक योजनालाई संघीय सरकारको उच्च प्राथमिकतामा राखेर बजेट विनियोजन गर्नुपर्ने भन्दै ध्यानाकर्षण गराइएको छ ।
चुलाचुली गाउँपालिका अध्यक्ष राजेन्द्र केरुङले पालिकाको तर्फबाट करिब १ अर्ब १० करोड रुपैयाँ लागत अनुमानसहितको विस्तृत परियोजना प्रतिवेदन (डीपीआर) सहितको माग पत्र प्रतिनिधिसभा सदस्य यज्ञमणी न्यौपानेलाई बुझाएका हुन् ।
सरकारको बहुवर्षीय परियोजनामा उक्त परियोजनालाई समेटनु पर्ने ति क्षेत्रका नागरिकहरुको माग रहेको अध्यक्ष केरुङले उल्लेख गरेका छन् ।
न्यौपाने मोरङको निर्वाचन क्षेत्र नं १ मा राष्ट्रिय स्वतन्त्र पार्टीको तर्फबाट निर्वाचित सांसद हुन् । सो सडकले छुने मधुमल्ला– उर्लाबारी क्षेत्र मोरङ १ मा पर्छ । सो सडकले पाँचथरको रवि सम्म जोड्नेछ ।
अध्यक्ष केरुङका अनुसार करिब १९० वर्षदेखि प्रयोगमा रहेको ऐतिहासिक सो मार्गलाई आधुनिक सडकमा स्तरोन्नोति गर्न सके पहाड–तराई आवागमन सहज हुनुका साथै दैनिक जनजीवन र व्यापारिक गतिविधिमा ठूलो सहजता आउनेछ ।
डीपीआर हस्तान्तरणमा अध्यक्ष केरुङसँगै सो सडक उपभोक्ता समितिका अध्यक्ष दीपक श्रेष्ठ लगायत अन्य पदाधिकारीहरु समेतको सहभागिता रहेको थियो ।
कार्यक्रममा प्रतिनिधिसभा सदस्य न्यौपानेले सो परियोजनालाई बहुवर्षीय योजनामा समेटेर बजेट सुनिश्चित गर्न पहल गर्ने प्रतिबद्धता जनाएका छन् । यसैगरी कोशी प्रदेश सभा सदस्य रञ्जना श्रेष्ठलाई समेत सो क्षेत्रका विभिन्न समेटिएको छुट्टै योजना फाइल बुझाइएको अध्यक्ष केरुङले जानकारी दिए ।
गाउँपालिका अध्यक्ष केरुङले विगतमा प्रस्तुत गरिएका अधिकांश योजनामा बजेट सुनिश्चित गर्न सफल भएको दाबी गर्दै यसपटक पनि सोही ढंगले काम अघि बढ्ने विश्वास व्यक्त गरे । ‘यो सडक केवल पूर्वाधार होइन, पहाड र तराई जोड्ने जीवनरेखा हो । बहुवर्षीय बजेटमार्फत यसलाई कार्यान्वयनमा ल्याउनेमा हामी विश्वस्त छौँ,’ उनले भने ।
गत वर्षको बजेट विनियोजनमा इलाम क्षेत्र नं. २ का संघीय सांसद सुहाङ नेम्बाङ तथा कोशी प्रदेशका अर्थमन्त्री रामबहादुर मगर रानासँगको सहकार्यमा चुलाचुलीका विभिन्न साना–ठूला योजनामा बजेट पार्न सफल भएको उदाहरण दिँदै अध्यक्ष केरुङले विकासका कामलाई निरन्तरता दिँदै नागरिकको सेवानै आफ्नो मुख्य लक्ष्य भएको बताएका छन् ।
स्थानीय युवाहरूले समेत उक्त पहलप्रति सकारात्मक प्रतिक्रिया दिएका छन् । स्थानीय युवा मिलन राईले भने, ‘अध्यक्ष केरुङले अघि सारेको योजना हाम्रो लागि निकै महत्वपूर्ण छ, हामी उहाँको कामप्रति धन्यवाद व्यक्त गर्छाैँ ।’
स्थानीयवासीहरूका अनुसार सडक निर्माण सम्पन्न भएमा क्षेत्रीय आर्थिक गतिविधि, कृषि उत्पादनको बजार पहुँच, तथा स्वास्थ्य–शिक्षा सेवामा पहुँच उल्लेख्य रूपमा सुधार हुने अपेक्षा गरिएको छ ।
अब संघीय र प्रदेश सरकारबाट बजेट विनियोजन भएपछि परियोजना कार्यान्वयनतर्फ अघि बढिने केरुङको भनाई छ ।
