दमक/पश्चिमी वायुको प्रभावका कारण आज पूर्वक्षेत्र सहित देशैभरको मौसममा परिवर्तन आएको छ ।
आज पूर्वी र मध्य भागका केही स्थान तथा पश्चिमी पहाडी भेगका थोरै स्थानमा मेघ गर्जन र हावाहुरीसहित वर्षाको सम्भावना रहेको मौसम पूर्वानुमान शाखाले जनाएको छ ।
प्रि–मनसुन भएकाले लगातार झरी नहुने र तुलनात्मक रुपमा पूर्व र मध्य क्षेत्रका पहाडी भूभागमा बढी वर्षा हुने देखिएको महाशाखाका मौसमविद् बरुण पौडेलले बताए ।
उनले पश्चिम तराईमा झण्डै १५ दिनदेखि जमीन तातेकाले शनिबारदेखि मौसममा बदली भई वर्षाको सम्भावना रहेको बताए ।
पछिल्लो २४ घण्टामा काठमाडौंमा सबैभन्दा बढी ११ मिलीमिटर वर्षा भएको छ ।
शनिबार र आइतबार पनि देशैभरिको मौसममा आंशिकदेखि सामान्य बदली रही पूर्वी तथा मध्यभागका केही र पश्चिमी पहाडी भेगका थोरै स्थानमा मेघ गर्जनसहित वर्षाको सम्भावना देखिएको महाशाखाले जनाएको छ ।
