शिवसताक्षी/ झापाको शिवसताक्षी–८ सृजना चोकस्थित ओएसिस् एकाडेमी ले नयाँ आगन्तुक विद्यार्थीहरुलाई स्वागत तथा सम्मान गरेको छ ।
शुक्रबार विद्यालय प्राङ्गणमा आयोजित कार्यक्रममा एकाडेमीका संस्थापक तथा प्रिन्सिपल उदयप्रकाश राई ले नयाँ विद्यार्थीहरुलाई स्वागत गर्दै सम्मान गरेका हुन् । सोही अवसरमा अनौपचारिक तह उत्तीर्ण गरी औपचारिक तह कक्षा–१ मा प्रवेश गरेका ३४ जना छात्र–छात्रालाई दीक्षान्तसमेत गरिएको विद्यालयले जनाएको छ ।
विद्यालयमा हाल पिजी तहदेखि कक्षा–८ सम्म पठनपाठन सञ्चालन भइरहेको जानकारी दिँदै प्रिन्सिपल राईले नयाँ विद्यार्थी भर्ना हुने क्रम अझै जारी रहेको बताए । उनले अनुभवी तथा दक्ष शिक्षक–शिक्षिकाबाट सुन्दर र शान्त वातावरणमा गुणस्तरीय शिक्षा प्रदान गरिँदै आएको उल्लेख गर्दै अभिभावकहरुले विद्यालय छनोट गर्दा शैक्षिक गुणस्तरलाई प्राथमिकता दिनुपर्नेमा जोड दिए ।
प्रिन्सिपल राईका अनुसार विद्यालयमा पाठ्यपुस्तकको अध्ययनसँगै विद्यार्थीहरुको सिर्जनात्मक कला, प्रतिभा तथा नेतृत्व विकासका लागि विभिन्न अतिरिक्त क्रियाकलापहरु पनि सञ्चालन गरिँदै आएको छ ।
त्यसैगरी कार्यक्रममा किरात राई समुदायको मौलिक सांस्कृतिक चाड उभौली पनि मनाइएको थियो । विद्यालय परिसरमा आयोजित कार्यक्रममा साकेला शिलि नृत्य प्रदर्शन गरिएको थियो । कार्यक्रमको सञ्चालन नम्रता राईले गरेकी थिइन् ।
