दमक/ सत्तापक्षीय नेपाली कांग्रेस र नेकपा एमालेका झापा जिल्ला शीर्ष नेताहरुबीच असमझदारी बढेको छ ।
कांग्रेस–एमालेबीचको दलीय समिकरण बनाएर झापाका सबै संघ संस्थाहरुमा कांग्रेस–एमालेको नेतृत्व स्थापित गर्ने दुई दलीय संयन्त्रको औचित्यमाथिनै प्रश्न चिन्ह खडा भएको सार्वजनिक भएको हो ।
पटक पटक निर्वाचन मिति सार्दै १३ बैशाखका लागि तोकिएको जिल्ला सहकारी संघ झापाको नेतृत्व चयन गर्ने अघिल्लो दिन कांग्रेस एमालेका जिल्लास्तरीय नेताहरुबीच नेतृत्व चयनमा असमझदारी र आरोप प्रत्यारोपका दस्तावेजहरु सार्वजनिक भएका हुन् ।
नेपाली कांग्रेसको झापा जिल्ला नेतृत्वले यसअघि कांग्रेस एमालेकाबीचमा संघको पदाधिकारी तथा सदस्यहरु र लेखा समितिमा समेत एकआपसमा नजुध्ने गरी उम्मेदवारी दिने बिषयमा भएको सहमति पत्रने सार्वजनिक गरेका छन् ।
सार्वजनिक गरिएको सहमति पत्रमा नेकपा एमालेले संघको जिल्ला अध्यक्षसहित खुल्ला उपाध्यक्ष , सचिव , कोषाध्यक्ष र लेखा संयोजक पदमा एमालेका तर्फबाट उम्मेद्वारी दिइने उल्लेख छ ।
त्यस्तै लेखा समिति सदस्य महिला कोटा, खुल्ला सदस्य ३, महिला सदस्य ३ र क्षेत्रगत सदस्य तर्फ ३ जना उम्मेदवारी दिने साथै संघको कांग्रेसका तर्फबाट संघको वरिष्ठ जिल्ला उपाध्यक्ष १, महिला उपाध्यक्ष १ र सहसचिव १ मा उम्मेदवारी दिइने उल्लेख छ ।
त्यस्तै कांग्रेसले सदस्यहरु तर्फ क्षेत्रगतरुपमा क्षेत्र नं २ र ५ मा , खुल्ला महिला सदस्यमा १ जना र लेखा समिति सदस्य १ जना उम्मेदवार बनाउने सहमति भएको थियो । सो सम्बन्धिको सहमति पत्र कांग्रेस झापाका सभापति देउकुमार थेवे , सचिव कृष्ण हुमागाइँ र कांग्रेस सम्बद्ध सहकारी विभागका झापा प्रमुख दुर्गाप्रसाद सापकोटाले हस्ताक्षर गरेका थिए भने एमालेका तर्फबाट पार्टीका जिल्ला अध्यक्ष प्रेम गिरी, एमाले कोशी प्रदेश सदस्य घनश्याम अधिकारी र एमालेका सहकारी विभाग प्रमुख हरिदास ढुंगानाले हस्ताक्षर गरेका थिए ।
२३ चैतमा भएको सो सहमति विपरीत हाल संघको निर्वाचनमा एमालेले उम्मेदवारी कायम राखेर जिल्ला सहकारी संघमा एकल दबदबा देखाउन खोजेकाले जिल्लास्तरमा रहेको कांग्रेस– एमाले संयन्त्रनै धरापमा परेको ति दलका निकटस्थ नेताहरु र सहकारीकर्मीहरुले जनाएका छन् ।
यसैबीच दुई दलका बीच भएको सो सहमति भंग भएको अवस्थामा तत्काल निर्वाचन कार्यक्रम स्थगित गरि पुनः निर्वाचन तालिका प्रकाशन गर्नुपर्ने मुख्य मागसहित संघको निर्वाचन समितिको कार्यालयमा कांग्रेस सम्बद्ध सहकारीकर्मीहरुको टोलीले शुक्रबार तालाबन्दी गरेको छ । सहसचिव पदका उम्मेदवार समेत रहेका कांग्रेस नेता विनोद ढकाल नेतृत्वको टोलीले विर्तामोडस्थित संघको निर्वाचन समिति कार्यालयमा तालाबन्दी गरेको हो । यसले संघको निर्वाचनबारे अन्योल छाएको बताइएको छ ।
