दमक/ पुरुषहरुमा हुने प्रोस्टेडको समस्यालाई मध्यनजर गर्दै दमक नगरपालिकाको ५ नम्बर वडामा प्रोस्टेडको क्यान्सर सम्बन्धि जनचेतना तथा निशुल्क प्रोष्टेड जाँच स्वास्थ्य शिविर सम्पन्न भएको छ ।
मंगलबार सञ्चालित सो शिविरमा वडा भित्रका ५५ बर्ष माथिका ७० जनाले प्रोस्टेड जाँच तथा उपचार परामर्श सेवा लिएका दमक ५ का वडा सचिव निधिनारायण ढुंगेलले जानकारी दिए ।
दमक नगरपालिका कार्यालयको आयोजनामा दमकका वडा तह सम्मनै यस किसिमको शिविर सञ्चालन गरिएको उपप्रमुख रेगिना भट्टराई प्रसाइँले जानकारी दिइन् ।
अधिक पुरुषहरुमा उमेर बढेसँगै प्रोस्टेडको समस्या देखिने र यसले क्यान्सरको जोखिम निम्त्याउने भएकाले क्यान्सरको जोखिम कम गर्न प्रोस्टेड सम्बन्धिको जनचेतनासहित वडा वडामा शिविरको शुरुवात गरिएको उपप्रमुख भट्टराईको भनाई छ ।
दमक ५ मा आयोजित शिविर कार्यवहाक वडाध्यक्ष खड्ग राईको अध्यक्षतामा सञ्चालन भएको थियो । दमक नगर प्रमुख रामकुमार थापाको प्रमुख आतिथ्यमा उपप्रमुख भट्टराईको विशेष आतिथ्य रहेको थियो ।
वडा सदस्य शोभा खतिवडा बेलबाँसेले स्वागत मन्तव्य राखेको कार्यक्रममा कार्यक्रममा कार्यपालिका सदस्य ख्यामकुमारी परियार, स्वास्थ्य शाखा प्रमुख ब्रजेश मेहता, दमक अस्पतालका सर्जन डा. चन्द्रप्रकाश मैनाली लगायतको विशेष उपस्थिती रहेको थियो । सोही प्रकृतिको शिविर आज दमकको ३ नम्बर वडामा सञ्चालन गरिने वडा कार्यालयले जनाएको छ ।
वडा सचिव बालकृष्ण कोइरालाका अनुसार बुधबार बिहान १० बजेदेखि आमचोकमा रहेको नगर स्वास्थ्य केन्द्रमा सो शिविर सञ्चालन हुनेछ । वडाबासी ५५ बर्ष माथिका पुरुषहरुलाई सो शिविरमा सहभागी भएर लाभ लिन कार्यवहाक वडाध्यक्ष गजेन्द्र धिमालले आग्रह गरेका छन् ।
