दमक/ झापाका तीन स्थानीय तहमा प्रशासनले आज रातभरका लागि निषेधाज्ञा जारी गरेको छ । प्रमुख जिल्ला अधिकारी गोपालप्रसाद अधिकारीले आज शनिबार साँझ जारी गर्नुभएको सूचना अनुसार दमक नगरपालिका क्षेत्र, विर्तामोड र भद्रपुरको आशिंक क्षेत्रमा राती ८ बजेदेखि आइतबार बिहान ५ बजे सम्मका लागि निषेधाज्ञा लागू हुनेछ । निषेधाज्ञा तोकिएको क्षेत्रमा सो अवधिमा पाँच जना भन्दा बढी मानिस भेला हुन, कुनै पनि किसिमका सभा, जुलुश, प्रदर्शन आदी गर्न पाइनेछैन ।
भाद्र २३ र २४ गते भ्रष्टाचार अन्त्य र शासकीय सुधारमा व्यापक जनदबाबका लागि भएको व्यापक जनप्रदर्शन र त्यसपछि उत्पन्न परिस्थितीका कारण दिउँसो समेत लगाइँदै आएको कर्फयू हटाएर रातको समयमा मात्रै निषेधाज्ञा क्षेत्र तोकिएको हो ।
जिल्लास्थित सुरक्षा अंगका प्रमुखहरुसहित प्रमुख जिल्ला अधिकारी गोपाल प्रसाद अधिकारीको अध्यक्षतामा आज बसेको सुरक्षा बैठकले जेन–जीको आन्दोलन टुंगिएर सुरक्षास्थिती सहज बन्दै गएको निष्कर्ष समेत निकालिएको छ ।
