दमक/ भाद्र २३ र २४ मा जेनजी समुहले गरेको प्रदर्शनका क्रममा कार्यालयमा भएको तोडफोड र आगजनीका कारण झापाको दमक नगरपालिका कार्यालय सञ्चालन अनिश्चीत छ ।
दमक नगरपालिकाका प्रमुख रामकुमार थापा, उपप्रमुख रेगिना भट्टराई र वडाध्यक्ष तथा कार्यपालिका सदस्यहरु सो घट्नापछि आज दिउँसो करिब १.३० बजे पहिलो पटक, पत्रकारहरु र मानवअधिकारकर्मी, तथा दमकका शैक्षिक तथा नागरिक अगुवाहरुसहित कार्यालय प्रवेश गरेर त्यहाँको भौतिक अवस्था नियाल्ने क्रममा कार्यालयको अवस्था टिठ लाग्दो देखिएको छ ।
२४ गते भएको आगजनीका कारण नगरपालिकाको पुरानो प्रशासनिक भवन ( हाल स्वास्थ्य, कृषि , रोजगार शाखा लगायत रहेको संरचना)भित्र औषधि तथा औषधिजन्य सामग्रीहरुमा धुँवा उडिरहेको दृश्य देखिएको छ । प्रदर्शनकारीहरुले त्यहाँको स्वास्थ्य शाखामा रहेका सरकारले निशुल्क उपलब्ध गराएको औषधि र औषधिजन्य सामग्री समेत जलाएको पाइएको छ ।
नगर सभा लगायतका अन्य सभा समारोहहरु हुने गरेको सभाकक्ष पूर्ण रुपमा जलेको पाइएको छ भने नयाँ प्रशासनिक भवनमा नगर प्रमुख र प्रमुख प्रशासकीय अधिकृतको कक्ष, सामाजिक विकास शाखा, आर्थिक प्रशासन शाखाहरुमा रहेका सामानहरु पूर्णरुपमा जलेको पाइएको छ ।
त्यस्तै उपप्रमुखको कक्ष, सूचना प्रविधि शाखा, प्रशासन शाखा लगायतमा पनि टेवल, कूर्सी, दराज लगायत महत्वपूर्ण कागजातहरु जलेर खरानी भएका पाइएको छ । हालसालै सञ्चालनमा आएको शिक्षा, युवा तथा खेलकुद शाखा रहेको अर्को नयाँ भवन र त्यसमा राखिएको ठुलो परिमाणमा रहेको सेनेटरी प्याड लगायतका सामान पनि जलेर नष्ट भएका छन् । दमक नगरपालिकामा आगजनीका क्रममा प्रदर्शनकारीहरुले त्यहाँको जेसीबि, एम्बुलेन्स लगायतका अत्यावश्यकीय सेवाका साधनहरुमा समेत आगजनी गर्दा करोडौंको नोक्सानी भएको छ ।
आगजनीसँगै त्यहाँबाट कतिपय जिन्सी सामग्रीहरु धमाधम मानिसहरुले बोकेर निस्किँदै गरेका दृश्यहरु समेत सामाजिक सञ्जाल मार्फत बाहिर आइरहेका छन् । कतिपयले ति सामान सुरक्षाका लागि आफूले लगेको भन्दै नगरपालिका र प्रहरीको अनुरोधपछि सम्बन्धित निकायमा बुझाउन पनि थालेका छन् । नगर उपप्रमुख भट्टराईले मानवीय संवेदनाको समेत ख्याल नराखि प्रदर्शनकारीहरुले अत्यावश्यकीय सार्वजनिक सेवामा उपयोग हुने सामग्रीहरु, औषधि लगायतका सामानहरु समेत जलाएको घट्नाले दुखी बनाएको बताउनु भयो ।
श्रीलंका, बंगलादेश जस्ता देशहरुमा समेत आन्दोलनकै बलमा सत्ता परिवर्तन भएको तर ति आन्दोलनहरुमा यस किसिमको मानवीय संवेदनाको ख्याल राखेर आन्दोलन भएको दृष्टान्त सुनाउँदै घट्नाको गम्भिर अनुसन्धान र छानविन गरिनु पर्ने बताउनु भयो ।
कार्यपालिका बैठक बस्ने तयारी
यसैबीच नगर प्रमुख रामकुमार थापाले दमक नगरपालिकामा कतिपय मानिसहरुले पूर्वाग्रही भावना राखेर नियतवश यस किसिमको अमानवीय क्रियाकलाप गरेको सूचना प्राप्त भइरहेको उल्लेख गर्नुभयो । यो घट्नापछि अब स्थानीय सरकार कुन रुपमा, कहाँबाट ? कसरी ? अघि बढ्ने भन्ने बारे कार्यपालिका बैठक बसेर निर्णय लिइने नगर प्रमुख थापाको भनाई छ । उहाँले आइतबारनै कार्यपालिका बैठक बस्ने तयारी रहेको जानकारी पनि दिनु भयो ।
शनिबार क्षतिग्रस्त अवस्थाबारे जानकारी लिन वडाध्यक्षहरु हरिप्रसाद न्यौपाने, प्रजापति सापकोटा, नविन बराल, पुण्यप्रसाद दाहाल, टेकबहादुर थापा, धर्मप्रसाद दाहाल, कुबेर भट्टराई, राजेन्द्र भण्डारी , कार्यपालिका सदस्यहरु शारदा सापकोटा, लोकबहादुर धिमाल, ख्यामकुमारी परियार लगायत जनप्रतिनिधिहरु, रेडक्रसकर्मी लिला गुरागाइँ, नेपाल मानव अधिकार संगठनका डा. केपी सुवेदी, दमक बहुमुखी क्याम्पसका प्रमुख यज्ञराज गिरी, पूर्व क्याम्पस प्रमुख एवं मानवअधिकारवादी उत्तम भट्टराई, एनप्याव्सनका नेता जयबहादुर श्रेष्ठ, प्याव्सनका नेताहरु कोषराज प्याकुरेल, जनार्दन मैनाली लगायत सहभागी हुनुहुन्थ्यो।
