दमक/ धेरै जसो राजनीतिक पार्टीहरु यतिबेला एक अर्कामा हिलो छ्यापाछाप गर्दै आरोप प्रत्यारोप गर्ने र शक्ति प्रदर्शनको होडबाजीमा उत्रिरहँदा नागरिकहरुमा दलहरुप्रति वितृष्णा बढ्दो छ ।
दलका नेतृत्वकर्ताहरु केवल पद , शक्ति र सत्ताको स्वार्थमा मात्रै केन्द्रित भइरहँदा नागरिकहरुबाट आएको गुनासो र असन्तुष्टिलाई स्वभाविक रुपमा लिन सकिन्छ । यही परिवेशमा झापाको शिवसताक्षी नगरपालिका वडा नं ६ स्थित शिवगञ्जमा भने नेपाली कांग्रेसको नगर समितिले ग्रामिण भेगका सर्वसाधारण नागरिकहरुको स्वास्थ्य क्षेत्रमा रहेको आवश्यकतालाई सम्बोधन गर्ने किसिमको जनसेवा केन्द्रित कार्यक्रम आयोजना गरेको छ ।
सोमबार कांग्रेसको शिवसताक्षी नगर समितिले आयोजना गरेको सो निशुल्क स्वास्थ्य शिविरबाट १ हजार ४ सय जना सर्वसाधारण लाभान्वित भएका छन् ।
शिविरमा नोवेल अस्पताल विराटनगरको चिकित्सक तथा प्राविधिक टिमले सहयोग गरेको थियो । सोमबार शिवगञ्जस्थित जनआदर्श माविको प्राङगणमा आयोजना गरिएको शिविरमा सो वडाका अतिरिक्त आसपासका पालिकाहरु गौरीगञ्ज र झापाबाट समेत सर्वसाधारणहरु स्वास्थ्य जाँच तथा उपचार सेवा लिन आएका थिए ।
कांग्रेसका महासमिति सदस्य भक्तिप्रसाद सिटौलाको प्रमुख आतिथ्य र नगर सभापति अशोक बस्नेतको सभापतित्वमा आयोजित शिविरको उदघाटन गर्दै सिटौलाले ग्रामिण क्षेत्रका नागरिकहरुको स्वास्थ्य सेवालाई नोवेल अस्पताल र कांग्रेसको नगर नेतृत्वले प्राथमिकतामा राखेको प्रति आभार प्रकट गर्नु भयो । उहाँले सिंगो राज्यको दायित्व एक पार्टी र एक स्वास्थ्य संस्था मिलेर पुरा गरेको पनि उल्लेख गर्नु भयो ।
शिविरमा जेनरल फिजिसियन विभाग, मुट सम्बन्धि, इसिजि र इको सेवा, हाड जोर्नी तथा नसा सम्बन्धी सेवा, कान–नाक–घाँटी, छाला रोग, मानसिक रोग, बाल रोग, दन्त रोग, आँखा, जेनरल सर्जरी, प्रसूति, स्त्रीरोग, भिडियो एक्स–रे, र ल्याब सेवा समेत उपलब्ध गराइएको थियो ।
शिवसताक्षी नगरपालिका–६ का अध्यक्ष मनोज खुलाल कार्कीले वडाबासीको स्वास्थ्य सेवामा पार्टी र नोबेल अस्पतालले गरेको सहयोगप्रति स्थानीय सरकारको तर्फबाट धन्यवाद व्यक्त गर्नुभयो । ‘स्वास्थ्य सबैका लागि, कांग्रेस तपाईँको साथमा’ भन्ने मूल नारासहित सञ्चालित एकदिवसीय शिविरले विपन्न नागरिक, जो नोवेल मेडिकल कलेज विराटनगरसम्म पुगेर सेवा लिन नसक्ने अवस्थामा थिए, उनीहरूलाई सहज रूपमा सेवा दिएको बताइएको छ ।
