दमक/ कमल गाउँपालिका २ नं. वडा कार्यालयको आयोजनामा वडाको समग्र बिकासका बिषयमा क्याम्पामा नयाँ तथा पुराना टोल विकास संस्था तथा नयाँ तथा पुराना बजार व्यवस्थापन समितिहरूबीच अन्तक्र्रियात्मक कार्यक्रम सञ्चालन गरिएको छ ।
सो अवसरमा उत्कृष्ट कार्य गर्ने टोल बिकास संस्था र बजार व्यवस्थापन समितिलाई सम्मान गरियो ।
वडा सदस्य महेन्द्र खत्रीको अध्यक्षता र वडाध्यक्ष अशोक सुब्बाको प्रमुख आतिथ्यमा आफ्नो कार्यकाल अवधिमा उत्कृष्ट कार्य सम्पादन गरी समुदाय विकासमा महत्वपूर्ण योगदान पुरयाएका समितिहरूका निवर्तमान पदाधिकारीहरुलाई सम्मान गरिएको हो ।
वडा कार्यालयको तर्फबाट भुत्लुङ टोल विकास संस्था र समयगढ बजार व्यवस्थापन समितिको योगदानलाई उत्कृष्ट घोषणा गरी सम्मान स्वरुप प्रमुख अतिथी वडाध्यक्ष सुब्बाले मायाको चिनो प्रदान गरेका छन् ।
वडा सदस्य तथा कार्यक्रमका अध्यक्ष खत्रीले सबै टोल विकास संस्था र बजार व्यवस्थापन समितिका निवर्तमान पदाधिकारीहरुलाई सम्मान पत्र प्रदान गरे ।
नागरिकहरुबीच अनुभव, योगदान र सिकाइबाट नयाँ समितिहरूलाई थप जिम्मेवार, सक्रिय र परिणाममुखी रूपमा कार्य गर्न सकारात्मक प्रेरणा र उर्जा मिल्ने विश्वास लिइएको वडाध्यक्ष सुब्बाले बताए ।
