दमक/ दमकस्थित दमक बहुमुखी क्याम्पसमा अध्ययनरत छात्रा विद्यार्थीहरूका लागि छात्रावास सेवा सञ्चालनको तयारी अन्तिम चरणमा पुगेको छ ।
क्याम्पस प्रशासनका अनुसार टाढा–टाढाबाट आएर अध्ययन गर्ने छात्रा विद्यार्थीहरूको सुरक्षा, आवास समस्या समाधान र शैक्षिक निरन्तरतामा सहजता ल्याउने उद्देश्यले छात्रावास सञ्चालनमा ल्याउने अन्तिम तयारी गरिएको हो ।
यसबाट विशेष गरी ग्रामीण तथा आर्थिक रूपमा कमजोर पृष्ठभूमिका छात्रा विद्यार्थीहरू लाभान्वित हुने अपेक्षा गरिएको छ । तत्काल ५० जना छात्राहरुलाई राख्ने व्यवस्था गरेका छौं, छात्रावासका लागि आवश्यक फर्निचर, लत्ताकपडा आदीको व्यवस्था भइसक्यो केही दिनमै यसको औपचारिक शुरुवात गरिनेछ– क्याम्पस प्रमुख यज्ञराज गिरीले भने ।
सो छात्रावासमा सुरक्षित बसोबासको व्यवस्था, आवश्यक खानेपानी तथा सरसफाइको व्यवस्था , अध्ययनमैत्री वातावरण रहको छ ।
शिक्षा क्षेत्रमा लैङ्गिक समानताको लक्ष्यलाई पछ्याउँदै दमक बहुमुखी क्याम्पसले छात्राहरुको सुविधाका लागि छात्रावास सञ्चालनमा ल्याइएको क्याम्पस प्रमुख गिरीले जानकारी दिए ।
बिद्यार्थीहरुको सुविधालाई प्राथमिकतामा राखेर कार्यक्रमहरु सञ्चानलमा ल्याइएको क्याम्पस प्रमुख गिरीको भनाई छ ।
स्थानीय अभिभावक, विद्यार्थी तथा सरोकारवालाहरूले सामुदायिक क्याम्पसमा यस किसिमको छात्रावासको सुरुवात हुनु प्रशंसनीय र महत्वपूर्ण उपलब्धीका रुपमा लिन सकिने प्रतिक्रिया दिएका छन् ।
क्याम्पस सञ्चालक समितिका अध्यक्ष ढुण्डीराज भण्डारी दमक बहुमुखी क्याम्पस पूर्वकै पूर्वाधारयुक्त शैक्षिक थलोका रुपमा बिकास गर्न सम्भव हुनुका पछाडी क्याम्पस सञ्चालक, प्रशासनसँगै यहाँका नागरिकहरुको राजनीतिक र प्रशासनिक क्षेत्रमा पहुँच पनि कारण भएको बताउँछन् ।
क्याम्पसलाई पछिल्लो समय प्रविधिमैत्री बनाउने र यहाँँका अधिकतम बिद्यार्थीहरुलाई सुलभ र सहज रुपमा उच्च शिक्षा दिलाउन माथिल्लो तहका सरकारहरुको पनि सहयोग आवश्यक रहेको अध्यक्ष भण्डारीको भनाई छ ।
क्याम्पसमा पछिल्लो समय विश्व बिद्यालय अनुदान आयोगसँगको सहकार्यमा क्याम्पसको भौतिक पूर्वाधार , प्रविधिहरुको बिकासका धेरै महत्वपूर्ण योजना सञ्चालनमा छन् । हाल क्याम्पसमा ७ करोड ५२ लाखको एउटा योजना कार्यान्वयनको अन्तिम चरणमा छ भने एक करोडको अर्को एउटा र १ करोड ८८ लाख अर्का एक योजना पनि स्वीकृतको अन्तिम चरणमा पुगेको छ ।
