आगामी फागुन २१ गते हुने प्रतिनिधि सदस्य निर्वाचनमा आचारसंहिता पालना गर्ने दमकका राजनीतिक दलले सामुहिक प्रतिबद्धता जनाएका छन् । आसन्न निर्वाचनका लागि दल तथा उम्मेद्वारहरुले पालना गर्नु पर्ने आचारसंहिता पालना गर्न आफुहरु प्रतिबद्ध रहेको धारणा ब्यक्त गरे ।
आज शुक्रबार दमक नगरपालीकामा भएको छलफलमा बोल्दै दलहरुले घृणा जगाउने अभिब्यक्ति बन्द गर्दै शान्तिपूर्ण रुपमा निर्वाचन सम्पन्न गर्नका लागि आफुहरु तयार रहेको साझा धारणा व्यक्त गरेका हुन ।
दमक नगरपालीकाका प्रमुख राम थापाले निर्वाचन नागरिकको अभिमत प्रकट गर्ने लोकतन्त्रको सुन्दर प्रक्रिया भएकोले यसलाई शान्तिपुर्ण रुपमा सम्पन्न गर्नु पर्ने सबैको दायीत्व रहेको बताउनु भयो । कार्यक्रममा दमक नगरपालीकाकी उप प्रमुख रेगिना भट्टराईले झापा क्षेत्र नम्बर ५ सबै तिरबाट चासोको क्षेत्र रहेको भन्दै यहाँ स्वच्छ राजनैतिक प्रतिस्पर्धा देखाउनु पर्ने बताउनु भयो ।
नेपाली कांग्रेस झापाका कार्यबाहक सभापति शेरबहादुर भट्टराईले मुलुकको राजनैतिक निकाशका लागी निर्वाचनको बिकल्प नभएको र सबै राजनैतिक दलहरु निर्वाचनमा होमिएकाले यसलाई स्वच्छ र मर्यादित बनाउनु पर्ने बताउनु भयो ।
कार्यक्रममा ईलाका प्रशासन कार्यालय दमकका प्रमुख विश्वराज नेपालले निर्वाचन आचारसंहिता पालनाको अवस्था बारे शूक्ष्म ढंगले अनुगमन भइरहेको भन्दै यदि निर्वाचन आचारसंहिता उल्लंघन भएको पाइए उम्मेद्वारी समेत खारेज हुन सक्ने तर्फ दलहरुलाई सजग गराउनु भयो ।
छलफलमा नेकपा एमाले दमक नगर अध्यक्ष राम पौडेल, कांग्रेस दमक नगर कार्यबाहक सभापति प्रेम भट्टराई, नेपाली कम्युनिष्ट पार्टि नगर अध्यक्ष रवि बस्नेत, रास्वापाका नगर भापति तिर्थ लामिछाने, राप्रपा नगर अध्यक्ष हेम सुवेदी, दमक उद्योग बाणीज्य संघका अध्यक्ष गोपाल गुरागाईं सहित धार्मिक तथा सामाजिक क्षेत्रका अगुवा सहित सबै सहभागीहरूले जेलबाट भागेका कैदी र अवैध हतियार नियन्त्रण गर्न, एआइ (कृत्रिम बुद्धिमत्ता) मार्फत फैलाइने घृणास्पद अभिव्यक्ति रोक्न र मतदाता शिक्षालाई प्रभावकारी बनाउन सरकारलाई सहयोग गर्ने प्रतिबद्धता जनाएका छन् ।
दलहरूले आचारसंहिता विपरीत चल्ने आफ्ना कार्यकर्तालाई आफैँले कारबाही गर्ने र निर्वाचनलाई उत्सवका रूपमा सम्पन्न गर्ने साझा निष्कर्ष निकालेका छन् ।
