दमक/ झापाको दमक ५ स्थित सर्वाेदय अंग्रेजी माध्यमिक विद्यालयले सोमबार बृहत कार्यक्रमसहित बार्षिको १८ औं बार्षिकोत्सव मनाएको छ । विभिन्न रचनात्मक कार्यक्रमहरु गर्दै बिद्यालयले वार्षिकोत्सव मनाएको हो ।
‘सिक्ने स्कुल’ का रुपमा परिचय बनाउँदै शैक्षिक क्रियाकलापहरु अघि बढाइरहेको यो बिद्यालयको बार्षिकोत्सवको अवसरमा बिद्यार्थीहरुले बनाएका विभिन्न मौलिक परिकारका खानेकुरा तथा मौलिक सामग्रीहरु प्रदर्शन गर्नुका साथै बिक्री स्टल समेत राखिएको थियो ।
वार्षिकोत्सवको उदघाटन समारोहमा स्थापनाकालदेखि हालसम्मका संस्थागत गतिविधिहरु , आगामी कार्यक्रम र योजनाका बारेमा प्रिन्सीपल नविन योगीले प्रष्ट पारेका थिए ।
दमकको शैक्षिक विकाससंगै सामाजिक सेवामा समेत यो बिद्यालयले खेलेको भूमिका र उत्तरदायित्वका बारेमा पनि उनले चर्चा गरे ।
प्रिन्सिपल योगीले विद्यालयमा दक्ष शिक्षक शिक्षिका, उत्कृष्ट कक्षा कोठा, स्वच्छ बातबरण, पिउने पानी, शौचालय, पर्याप्त प्रविधिहरुसहित विद्यार्थीलाई विद्यालयमा आर्कषण गर्न निरन्तर प्रयासरत रहेको बताए ।
विद्यालय व्यवस्थापन समिति अध्यक्ष अनिल सुवेदीको अध्यक्षतामा र दमक नगरपालिकाका प्रमुख रामकुमार थापाको प्रमुख आतिथ्यतामा सञ्चालन भएको सर्वोदय ट्यालेन्ट अन्तर्गत विभिन्न प्रतियोगिताका उत्कृष्ट बिद्यार्थीहरुलाई पुरस्कार समेत वितरण गरिएको थियो ।
कार्यक्रममा विद्यार्थीहरुले तयार परिएको विज्ञान प्रर्दशनी, हस्तकलाका सामाग्री, खेलखेलौनाहरुको प्रर्दशन, नाटक मञ्चन, स्काउट प्रदर्शन, विभिन्न जातजातीका मौलिक साँस्कृतिक खानाका परिकारहरु प्रर्दशन गरिएको थियो ।
त्यस्तैं, विद्यालयमा सर्वाेदय गड ट्यालेन्ट अन्तर्गत विद्यार्थीवीच गायन र नृत्यतर्फ प्रतियोगिता सञ्चालन गरिएको थियो । विद्यालयमा कार्यरत दुईजना शिक्षक र शिक्षिकालाई दोसल्ला ओढाएर सम्मान गरिएको थियो ।
समारोहमा दमक ५ का वडाध्यक्ष इन्द्र गुरुङ, शिक्षा समिति संयोजक तथा वडा नम्बर ९ का अध्यक्ष कुवेर भट्टराई, शिक्षा तथा खेलकुद शाखाका अधिकृत सोम गुरागाई, विद्यालयका पूर्व अध्यक्ष गंगाराम भट्टराई, दमक ५ की वडा सदस्य सरु परियार, निम्स नेशनल अस्पतालका अध्यक्ष उमाकान्त आचार्य, साहित्यकार धनकुटे कान्छा लगायतको आतिथ्य रहेको थियो ।
