दमक/ झापाको शिवसताक्षीमा बर्षेनी सञ्चालन हुँदै आएको मेयर कप खेलकुद प्रतियोगितालाई यस बर्ष पनि निरन्तरता दिइएको छ ।
खेलकुदका माध्यमबाट नगरबासी खेलाडीहरुलाई आपसमा जोड्दै भाइचाराको सम्बन्ध बिकास गराउने र स्थानीयस्तरका खेल प्रतिभाहरुको उजागर गर्ने उद्धेश्यले सञ्चालन हुँदै आएको मेयर कप प्रतियोगितालाई यस बर्ष पनि निरन्तरता दिइएको शिक्षा, युवा तथा खेलकुद शाखाले जनाएको छ ।
यही चैत १६ गतेदेखि शुरु हुने प्रतियोगिताकाबारेमा मंगलबार शिवसताक्षी नगर खेलकुद बिकास समितिले पत्रकार सम्मेलन मार्फत विस्तृत सार्वजनिक गरेको छ ।
सो अवसरमा शिवसताक्षी नगरपालिकाकी प्रमुख प्रशासकीय अधिकृत सुनिता सम्बाहाम्फे, आर्थिक प्रशासन शाखा प्रमुख प्रकाश योङहाङ, शिक्षा युवा तथा खेलकुद शाखा प्रमुख छवि ढकाल लगायतको विशेष उपस्थिती रहेको थियो । समितिका संयोजक सुरज राईको अध्यक्षतामा सञ्चालित सो पत्रकार सम्मेलनमा जनाइए अनुसार दुधे रंगशालामा (खेल मैदान) मा आगामी चैत्र १६ गतेदेखि २२ गतेसम्म सो प्रतियोगिता सञ्चालन हुनेछ ।
प्रतियोगितामा फुटबल, भलिबल, क्रिकेट, व्याडमिन्ट र कराँते खेल सञ्चालन हुने छन् । प्रतियोगिताको फुटबल तर्फ प्रथमले ७५ हजार, द्वितीयले ४५ हजार सहित ट्रफी मेडल र प्रमाण प्राप्त गर्ने छन । त्यस्तै भलिबल र तर्फ प्रथमले ४० हजार र, द्वितीयले २५ हजार , क्रिकेट खेल तर्फ प्रथमले ५० हजार र, द्वितीयले ३१ हजार र भलिबल खेल तर्फ विजेताले ४० हजार उपविजेताले २५ हजार सहित ट्रफी मेडल, प्रमाण पत्र प्राप्त गर्ने आयोजक शिवसताक्षी खेलकुद विकास समितिका संयोजक राईले जानकारी दिए ।
मेयर कपमा व्याडमिन्ट सिंगल र डबल, कराँते विधाका समेत खेलहरु समावेश हुनेछ । आयोजकले सबै विधाका खेलमा विधागत उत्कृष्ट हुने खेलाडीहरुलाई समेत पुरस्कृत गरिने जनाएको छ ।
प्रतियोगिताका सबै खेलहरुमा नगरका ११ वटै वडाका टिमले सहभागिता जनाउने शिवसताक्षी नगरपालिकाले जनाएको छ ।
क्रिकेट खेल शिवसताक्षी ६ स्थित जन आदर्श माविको खेल मैदानमा सञ्चालन हुनेछ । कराँते प्रतियोगिता भने झिलझिलेमा सञ्चालन हुने आयोजकले जनाएको छ । सबै प्रतियोगिताहरु सञ्चालनका लागि सम्बन्धित विधाका खेलका अनुभवी र विज्ञहरुको टिमलाई जिम्मेवारी दिइएको पनि पत्रकार सम्मेलनमा जनाइयो । सोही अवसरमा खेलमा सहभागिताका बिषय केन्द्रित प्रोटेस्ट र नियमहरुका बिषयमा पनि जानकारी गराइएको थियो । सबै खेलका सबै खेलाडीहरु शिवसताक्षी नगरका स्थायीबासिन्दा हुन अनिवार्य गरिएको र कुनै पनि टिमले नगर बाहिरका खेलाडी सहभागी गराउन नपाउने व्यवस्था कडाइँका साथ लागू गरिने आयोजकले जनाएको छ ।
