झापा/ शुक्रबार रातीको हावाहुरीका कारण झापामा सार्वजनिक तथा व्यक्तिगत घर तथा अन्य भौतिक संरचनाहरुमा ठुलो क्षति पुगेको छ ।
हावाहुरीका कारण कैयौं ठाउँमा बिद्युत पोल ढलेका छन भने बिद्युत सेवा अवरुद्ध हुनका साथै आवागमनमा कठिनाई भएका खबरहरु प्राप्त भएका छन् ।
बिद्यालय भवन र सर्वसाधरणका घर गुहाली , बाली नाली र अन्नपातहरुमा समेत हावाहुरी र बर्षाको कारण नोक्सान पुगेको प्रहरी र जनप्रतिनिधिहरुले जानकारी दिएका छन् । शिवसताक्षी नगरपालिका वडा नं ६ का वडाध्यक्ष मनोज खुलालका अनुसार शिवगञ्ज बजार र वरपरका बस्तीहरुमा हावाहुरीले ठुलो नोक्सान गरेको छ ।
वडाध्यक्ष खुलालले भने– धेरै घर, स्कूलका छानाहरु हावाले भत्काएको छ । उडाएको छ । बिजुलीका तारहरु चुटिएका छन् । पोलहरु ढलेका छन् । आवतजावतनै अवरुद्ध हुने गरि बाटोमा रुखहरु ढलेका छन् ।
उनका अनुसार हावाहुरीका कारण भएको क्षतिको पूर्ण विवरण संकलन भइसकेको छैन ।
भद्रपुर ३ मा बुधय मुर्मुको टिनको छानो भएको घरमा क्षति पुगेको छ भने घरमा पालिएका २० वटा कुखुराका चल्ला मरेका छन् ।
त्यस्तै सोही ठाउँका कमल गणेश, दुखिया महतो र मिस्त्री राजवंशीकोे घरमा क्षति भएको जिल्ला प्रहरी कार्यालय झापाले जनाएको छ ।
