दमक/ हरेक वर्ष मोफसलमा रहेर भाषा, साहित्य,कला, सँस्कृतिको क्षेत्रमा समर्पित मध्ये एक जनालाई प्रदान गरिने नइ देरुनीख गौरव पुरस्कार २०८० बाट झापा दमकका साहित्यकार शंकर चापागाइँ ( धनकुटे कान्छा) सम्मानित भएका छन् ।
काठमाडौंस्थित आम्रपाली ब्याक्वीटको सभाहलमा आयोजित एक कार्यक्रममा उनलाई प्रकाशनका कुलपति इन्दिरा प्रसाई तथा सदस्य सचिव नरेन्द्रराज प्रसाईं साथै कार्यक्रमका प्रमुख अतिथि प्रा. चेतोनाथ शर्मा आचार्यले नगद ५०,००० ( पचास हजार ) , ताम्रपत्र, मेडल र मायाको चिनोसहित सम्मान गरेका हुन् ।
सो पुरस्कार रामबाबु प्रसाई तथा उनका परिवारको नाममा स्थापना गरिएको हो । साहित्यकार धनकुटे कान्छालाई भाषा,साहित्य,कला, सस्कृति साथै शिक्षाको क्षेत्रमा विधागत तथा संस्थागत विकासमा ३ दशक भन्दा लामो समयदेखि मोफसलमा रहेर पुर्याउँदै आएको योगदानका लागि यो पुरस्कार प्रदान गरिएको बताइएको छ ।
धनकुटे कान्छा कवि,गजलकार, समीक्षक, सम्पादक,स्तम्भकार एवम् साहित्यिक अभियन्ताका रुपमा परिचित स्रष्टा हुन्। ।
उनका पाँच मौलिक कृतिहरु प्रकाशित छन् भने विभिन्न खोजमूलक ग्रन्थ तथा साहित्यिक प्रकाशनहरु सम्पादित कृतिहरु छन्। । उनी नेपालकै पहिलो चरा कराउने कलाकार समेत हुन् । उनको भाषिक,साहित्यिक तथा व्यक्तित्व विषयमा स्नात्तकोत्तर तहका लागि ३ जनाले सोधपत्रसमेत लेखेका छन्।् ।
सोही अवसरमा देश विदेशका लब्धप्रतिष्ठित नेपालीभाषी के. बी. नेपाली, प्रा. गोपीकृष्ण शर्मा,ध्रुव थापा,डा. वसन्त पन्त ,डा. शान्ति क्षेत्री, डा. जीवन नाम्दुङ, रञ्जीत गजमेर , राधिका गुरागाँईलगायतका विभिन्न विधाका स्रष्टाहरुलाई विभिन्न पुरस्कारबाट सम्मान गरिएको आयोजक संस्थाले जनाएको छ ।
