दमक/ झापाको दमक नगरपालिका वडा नम्बर ८ मा सञ्चालित भजन कीर्तन टोलीका सदस्यहरुलाई बाद्यवादन सम्बन्धिको तालिमसँगै सामग्री हस्तान्तरण गरिएको छ ।
वडा नम्बर ८ को कार्यालयलले चालू आर्थिक बर्ष २०८१/०८२ को स्वीकृत बजेट तथा कार्यक्रम अन्तर्गत वडाभित्र सञ्चालनमा रही वडा कार्यालयमा सूचीकृत हुन आएका १४ वटा कीर्तन मण्डलीलाई गोलाप्रथाका आधारमा पाँच वटा हार्मोनियम र सबैलाई मादलसहित बाद्यवादनका सामग्री हस्तान्तरण गरिएको हो ।
वडा सचिव सन्दिप सुवेदीका अनुसार बाद्यवादन तालिम समापन तथा ति सामग्री हस्तान्तरण गर्न आयोजित औपचारिक कार्यक्रममा तालिममा सहभागीहरुबीच प्रतिस्पर्धा समेत गराइएको थियो ।
सो प्रतिस्पर्धाका उत्कृष्ट कीर्तन मण्डलीलाई प्रोत्साहन स्वरुप स्पीकर प्रदान गरिएको थियो । दमक ८ का वडाध्यक्ष धर्मप्रसाद दाहाल (दिपेश)ले ति सामग्री हस्तान्तरण गर्दै वडा कार्यालय सबै वडाबासीहरुको अभिभावक हुनुका नाताले यस किसिमका धार्मिक तथा साँस्कृतिक पक्षको बिकासमा समेत जोड दिदैं आएको बताए । उनले भजन कीर्तनका माध्यमबाट पनि समाजमा अनुशासन र असल कामहरुको अभ्यास गर्न सकिने भएकाले यस किसिमका प्रोत्साहनलाई निरन्तरता दिईने बताए । समापन कार्यक्रममा वडा सदस्यहरु ख्याम श्रेष्ठ, पदम गिरी, हरिमाया चुँडाल , ममता रसाइलीसहित स्थानीय सामाजिक तथा धार्मिक अगुवाहरु, ज्येष्ठ नागरिक तथा महिलाहरुको उल्लेखिय उपस्थिती रहेको थियो ।
४५ दिन सम्म सञ्चालन गरिएको बाद्यवादन तालिममा बिहानी कला केन्द्रका संगीत प्रशिक्षक हेमन्त रिजालले सहजीकरण गरेका थिए । बाद्यवादन तालिममा १४ वटै कीर्तन मण्डलीबाट दुई/दुई जनाका दरले सहभागी थिए ।
