दमक/ झापाको दमकस्थित सरकारी अस्पताल दमक अस्पतालमा सघन उपचार कक्ष (आइसीयू सेवा) सुचारु भएको छ । अस्पतालमा सोमबार एक कार्यक्रमबीच सघन उपचार कक्ष (आइसीयू ) उद्घाटन गरिएको हो ।
लायन्स क्लव इन्टरनेशनल फाउण्डेशन,स्थानीय लायन्स क्लव तथा दमक नगरपालिकाको साझेदारीमा अस्पतालमा लायन्स आइसीयू सेन्टर निर्माण गरिएको हो ।
लायन्स क्लव इन्टरनेशनल फाउण्डेशनको रु १ लाख ३७ हजार ७ सय १८ रुपिया यूएस डलर ( करिव रु २ करोड) , लायन्स क्लवहरुको तर्फबाट रु १४ लाख र दमक नगरपालिकाको रु ५१ लाख रुपियाको साझेदारीमा झण्डै रु २ करोड ५० लाख रुपैयाँको लगानीमा आइसीयू सेवा सञ्चालनमा ल्याइएको अस्पतालका मेडिकल सुपरिटेन्टडेन्ट डा. कृष्णप्रसाद साहले बताए ।
उनका अनुसार ३ वटा भेन्टिलेटरसहित ६ वटा शैयाको आइसीयू सुविधा रहेको छ ।
नवनिर्मित आइसीयू कक्षको लायन्स इन्टरनेशनलका डाइरेक्टर बालकृष्ण बुर्लाकोटी र दमक नगरपालिकाका प्रमुख रामकुमार थापाले संयुक्त रुपमा उद्घाटन गरे । आइसीयू उद्घाटन कार्यक्रममा नगर प्रमुख थापासहित उपप्रमुख रेगिना भट्टराई (प्रसाइँ) सहित लायन्स क्लबका विशिष्ट व्यक्तित्वहरुले सो सहयोगको प्रशंसा गर्दै समुदायमा यस किसिमका नमुना कामहरु अघि बढाउन समन्वय र सहकार्यमा जोड दिए ।
अस्पतालका प्रशासन प्रमुख तथा सूचना अधिकारी डा. अनुपम घिमिरेले आइसीयूको उद्घाटनपछि अव जटिल प्रकृतिका बिरामीको शल्यक्रिया सहित अन्य उपचार सेवा समेत प्रदान गर्न सहज हुने जानकारी दिए । उनले भने, ‘अस्पतालमा सबैरोगका विषेशज्ञ चिकित्सक भएपनि आइसियूको अभावमा रेफर गरिरहनु पर्ने बाध्यता अव त्यसको पनि अन्त्य भएको छ ।’
। लायन्स क्लव अफ इन्टरनेशनल डिस्ट्रिक ३२५ सि का डिस्ट्रिक गभर्नर तथा ग्राण्ड एडमिनिस्ट्रेटर विकास अधिकारीको अध्यक्षतामा सो कार्यक्रम सम्पन्न भएको थियो । २०७३ सालमा स्थापना भएको १५ शैयाको सो अस्पतालमा दैनिक ७ सय बढी विरामीले विभिन्न किसिमका वहिरङ स्वास्थ्य सेवा लिदै आएका छन् ।
