कमल / कमल गाउँपालिकाले पालिका भित्रका उत्कृष्ट विद्यालय व्यवस्थापन समिति , अवकाश प्राप्त तथा कार्यरत शिक्षक , कर्मचारीलाई सम्मानसँगै बिद्यार्थीहरुलाई नगद छात्रवृत्ति वितरण गरेको छ ।
१९ असारमा कमल २ स्थित महेन्द्ररत्न माध्यमिक विद्यालयको सभाकक्षमा आयोजित कार्यक्रमबीच एसइइ परीक्षा २०८१ मा शतप्रतिशत विद्यार्थीलाई उत्कृष्ट ग्रेड हासिल गराउन सफल कमल १ स्थित बाँसवारी माध्यमिक विद्यालयका प्रधानाध्यापक केशर बहादुर श्रेष्ठ लगायत विभिन्न विद्यालयमा कार्यरत शिक्षक र कर्मचारी गरी २० लाई सम्मान पत्र , खादा र नगद ८ हजार रुपैयाँसहित सम्मान गरिएको हो ।
गाउँपालिका अध्यक्ष हुकुमसिंह राई र उपाध्यक्ष प्रमिला न्यौपानेले सम्मानितहरुलाई सम्मान गर्नुभएको थियो । उत्कृष्ट विद्यालयको रुपमा बाँसवारी माबिलाई सम्मान पत्र सहित नगद ३० हजार रुपैयाद्वारा सम्मान गरिएको हो ।
उत्कृष्ट अध्यक्षको सम्मान राईलाई
त्यसैगरी गरी लामो समय बिद्यालयमा अध्यापन गराई सेवा निवृत्त हुनुभएका १२ जना शिक्षकलाई समेत सम्मान पत्र र खादाले सम्मान गरिएको थियो । त्यस्तै विद्यालय व्यवस्थापन समितिका अध्यक्ष हरु मध्ये वडा नम्बर २ स्थित महेन्द्र रत्न माध्यमिक विद्यालय व्यवस्थापन समितिका अध्यक्ष पवन राईलाई सम्मान पत्र र खादा द्वारा सम्मान गरिएको थियो ।
त्यसैगरी कमल गाउँपालिका भित्र सञ्चालनमा रहेका सामुदायिक विद्यालयमको शैक्षिक तथा भौतिक सुधारका साथै विद्यालयमा शुद्ध पिउने पानीको व्यवस्थापनका लागि उत्कृष्ट कार्य गरेकोमा वर्क फर नेपाललाई समेत सम्मान गरिएको थियो ।
त्यसैगरी कक्षा ११ र १२ मा अध्यायनरत सिमान्तकृत ६८ जना विद्यार्थीलाई जनही ४ हजार ३ सय रुपैया, ११ जना दलित विद्यार्थीलाई १५ हजार देखी ५० हजार रुपैया सम्म र बुबा आमा विहीन १४ जना विध्यार्थीलाई ३ हजार देखी १० हजार रुपैया सम्म छात्रवृत्ति प्रदान गरिएको थियो ।
त्यसैगरी कमल गाउँपालिका वडा नम्वर २ स्थित महेन्द्ररत्न माध्यमिक विद्यालय र कमल ७ स्थित सरस्वती माध्यमिक विध्यालयमा प्राविधिक विषय अध्यायनरत २१ जना विध्यार्थीलाई जनही २३ हजार ५ सय रुपैयाका दरले छात्रवृत्ति प्रदान गरिएको थियो ।
कमल गाउँपालिकाका सामुदायिक बिद्यालयहरुले यस बर्षको एसइइ परीक्षाको नतिजामा ७१ प्रतिशत बिद्यार्थीलाई ग्रेड हासिल गराउन सफल भएपछि कमलको शिक्षा क्षेत्रमा यसले राम्रो सन्देश दिएको छ । सामुदायिक शिक्षालाई उत्कृष्ट बनाउन कुनै एक पक्षको प्रयासबाट मात्रै सम्भव नहुने भन्दै गाउँपालिका अध्यक्ष राईले सबैको साझा प्रयासबाटनै यस किसिमको सफलताको उचाई बढ्दै जाने बताउनु भयो । गाउँपालिका भित्र सञ्चालनमा रहेका सामुदायीक विद्यालयमा कार्यरत शिक्षकहरुलाई सम्मानसहित प्रोत्साहनका कार्यक्रम ल्याइएको उहाँले बताउनु भयो । सेवा निवृत्त र कार्यरत शिक्षकलाई समेत एउटै मञ्चमा राखेर सम्मान गर्न पाउदा खुशी लागेको र यसलाई समेत निरन्तता दिने राईले बताउनु भयो । त्यसैगरी हुने खाने र हुँदा खाने बिचको अन्तरलाई हटाउदै सबै कमलबासीलाई समान शिक्षा पाउनु पर्छ भनेर गाउँपालिकाले अभिभावक विहीन, सिमान्तकृत दलित विद्यार्थीलाई छात्रवृत्ति समेत प्रदान गरेको अध्यक्ष राईले बताउनु भयो ।
गाउँपालिका उपाध्यक्ष न्यौपानेले बिद्यार्थीहरुले पाएको छात्रवृत्ति रकमलाई सहि ठाउँमा उपयोग गर्न सुझाव दिनुभयो । कमल गाउँपालिकाकाको शिक्षा सुधार गर्न जनप्रतिनिधी र शिक्षक मिलेर अघि बढ्न सक्नु पर्छ – न्यौपानेले भन्नु भयो । कमल २ का वडाध्यक्ष अशोक सुब्बाले सम्पुर्ण शिक्षकहरु बिगतमा रहेका कमी कम्जोरीलाई सच्याउँदै आफ्नो ठाउँको शैक्षिक सुधारमा सकारात्मक सोच राखेर एकजुट भएर लाग्नुपर्ने बताउनु भयो ।
पछिल्लो समय कमल गाउँपालिकाले शिक्षाको क्षेत्रमा गरेको योगदानले गाउँपािलकाको समग्र शैक्षिक गुणस्तरमा धेरै सुधार आएको कमल ५ स्थित मंगलमय माध्यमिक विद्यालय व्यवस्थापन समितिका अध्यक्ष टिकाराज सापकोटाले बताउनु भयो ।
त्यसैगरी सेवा निवृत्त शिक्षकका तर्फबाट गोपाल चन्द्र भुजेलले सम्मानित हुन पाएकोमा गाउँपालिका प्रति आभार व्यक्त गदै धन्यवाद दिनुभयो ।
कार्यक्रम शिक्षा युवा तथा खेलकुद शाखामा प्राविधिक सहायक तथा कार्यक्रम संयोजक रविन गौतमले सञ्चालन गर्नु भएको थियो भने शाखा प्रमुख सुर्य प्रसाद न्यौपानेले स्वागत गर्नु भएको थियो ।
