दमक/ झापाको दमक ५ मा सञ्चालित डाँफे सामुदायिक बचत तथा ऋण सहकारी संस्थाले १९ औं स्थापना दिवस मनाएको छ ।
शुक्रबार संस्थाले रक्तदान र शेयर सदस्यहरुको सम्मान तथा सहकारी अभियान्ता र सदस्यहरुबीच अन्तरक्रियात्मक कार्यक्रम गरेको हो । सो अवसरमा कूल ५१ जनाले रक्तदान गरेका संस्थाका व्यवस्थापक शंकर नेपालले जानकारी दिनु भयो ।
कार्यक्रममा आफ्ना शेयर सदस्यहरुमाझ संस्थाको हाल सम्मको वित्तीय अवस्थाबारे जानकारी गराउँदै उत्कृष्ट कारोबार गर्ने सदस्यहरुलाई पुरस्कृत एवं सम्मान प्रदान गरेको छ ।
कार्यक्रममा उत्कृष्ट कारोबार गर्ने संस्थाका शेयर सदस्यहरु कुमार राई, मैना दाहाल, गोपाल ढुंगेल, खेमनाथ सापकोटा, देवीमाया कटुवाल, खगेन्द्र खतिवडा, लिलादेवी भट्टराई, युनिसा भट्टराई, सदिक्षा उप्रेती लगायत ५१ जनालाई पुरस्कृत गरिएको थियो ।
संस्थाका अध्यक्ष तुलाराम न्यौपानेको अध्यक्षता र राष्ट्रिय सहकारी महासंघका वरिष्ठ उपाध्यक्ष रमेशकुमार पोखरेलको प्रमुख आतिथ्यमा आयोजित सो कार्यक्रममा सहकारी अभियान्ताहरु र संस्थाका सदस्यहरुबीच सघन छलफल र अन्तरक्रिया समेत सञ्चालन गरिएको थियो ।
संस्थाका अध्यक्ष न्यौपानेले संस्थाको हालको वासलात ९३ करोड रुपैयाँ बराबरको रहेको जानकारी गराउनु भयो ।
सो अवसरमा संस्थाले हाल महिला शेयर सदस्यहरुलाई लक्षित गर्दै अधिकतम १० लाख रुपैयाँ सम्म महिला उद्यमी कर्जा लगानी गर्ने नीति लिएको जानकारी गराइएको थियो । संस्थामा कूल ८ हजार २ सय २१ शेयर सदस्यहरु रहेको पनि कार्यक्रममा जानकारी गराइयो ।
सो अवसरमा अवकाशको सन्मुखमा रहनु भएका कोशी प्रदेश सहकारी रजिष्टार हरीबहादुर खत्रीलाई डाँफे सामुदायिक साकोस र जिल्ला बचत तथा ऋण सहकारी संघ झापाका तर्फबाट सम्मान समेत गरिएको थियो ।
सो संस्थाको स्थापना दिवस विशेष कार्यक्रमको उदघाटन गर्दै प्रमुख अतिथी राष्ट्रिय सहकारी महासंघका वरिष्ठ उपाध्यक्ष रमेश पोखरेलले देशभरका सहकारी संस्थाहरुमा ११ खर्ब रुपैयाँ बराबरको कारोबार रहेबाट पनि मुलुकको अर्थतन्त्रको ठुलो हिस्सा सहकारी क्षेत्रले ओगटेको उल्लेख गर्नु भयो । उहाँले सहकारी संस्थाहरुलाई सरकारले हेर्ने दृष्टिकोणमा परिवर्तनको खाँचो रहेको पनि औंल्याउनु भयो ।
कार्यक्रममा सम्मानित व्यक्तित्व रजिष्टार खत्री, जिल्ला सहकारी संघ झापाका अध्यक्ष प्रेम कोइराला, मेची सहकारी संस्थाका सचिव राजेन्द्र दाहाल, मेनेजर्स क्लब झापाका अध्यक्ष खोमप्रसाद बगाले लगायत सहकारी क्षेत्रका अगुवा अभियान्ताहरुले शुभकामना मन्तव्य राख्दै सहकारीहरुबीचको एकता, अभियानका क्रममा देखिएका समस्या, राज्यको दृष्टिकोण, सरकारले लिएको सहकारी सम्बन्धिको कर्जा नीति आदीका बारेमा भनाईहरु राख्नु भएको थियो । संस्थाका उपाध्यक्ष सन्तोष श्रेष्ठले स्वागत मन्तव्य राख्दै संस्थाको इतिहासदेखि वर्तमान अवस्थाका बारेमा जानकारी गराउनु भएको थियो भने संस्थाका सचिव लिलानाथ खनालले सञ्चालन गर्नु भएको थियो ।
