इलाम/ इलामको चुलाचुली गाउँपालिका अध्यक्ष राजेन्द्र केरुङले गाउँपालिका भित्रका सार्वजनिक सरोकारका बिषयहरुमा काठमाडौं पुगेर संघीय सरकारको ध्यानाकर्षण गराउनु भएको छ ।
अध्यक्ष केरुङले पूर्व प्रधानमन्त्री एवं नेपाली कांग्रेसका सभापति शेरबहादुर देउवा, शहरी बिकास मन्त्री प्रकाशमान सिंह, कृषि राज्य मन्त्री अरुण चौधरी लगायतसँग साक्षात्कार गर्दै अध्यक्ष केरुङले समसामयिक बिषय र चुलाचुलीबासीले भोग्दै आएका समस्याहरुको स्थायी समाधानका लागि भइरहेका प्रयत्न र सरकारको साथ सहयोगको अपरिहार्यता बिषयमा जानकारी गराउनु भएको हो ।
पालिका भित्र विबिध कारणले आर्थिक बर्ष २०८१/०८२ मा फ्रीज हुन पुगेको बजेट पुन सुनिश्चित गर्न , थप बजेटको व्यवस्था गर्न र चुलाचुलीको भुमी समस्याको स्थायी समाधानका लागि नापीको व्यवस्था गर्न पार्टी सभापति तथा पूर्व प्रधानमन्त्री देउवासहित बहालवाला मन्त्रीहरुसँग महत्वसाथ छलफल गरि ध्यानाकर्षण गराइएको अध्यक्ष केरुङले जानकारी दिनु भयो ।
शान्ती सुरक्षा तर्फ चुलाचुली प्रहरी चौकीको स्तरोन्नती , आवश्यक पूर्वाधार व्यवस्थापन कृषि, पर्यटन र चुलाचुली अस्पतालमा आवश्यक थप स्वास्थ्य सामाग्रीको उपलब्धताका लागि पनि भेटघाटका क्रममा छलफल भएको छ ।
चुलाचुली गाउँपालिका इलाम जिल्लामानै पछिल्लो समय सडक पूर्वाधार, शिक्षा लगायतका विभिन्न क्षेत्रमा सन्तुलित बिकासमा फड्को मारिरहेको पालिकाका रुपमा छ । गत बर्ष कार्यसम्पादन मुल्याङकनमा जिल्लाकै उत्कृष्ट गाउँपालिकाका रुपमा रहेको चुलाचुलीले हालै सार्वजनिक भएको एसइइ परीक्षामा पनि जिल्लामै उत्कृष्ट स्थान ओगट्न सफल भएको पालिका हो ।
