दमक/ जनमुखी कामको अभ्यासलाई अघि बढाइरहेका शिवसताक्षी नगरपालिका वडा नं ६ का जनप्रतिनिधिहरुले वडाबासीलाई परेको शोकमा सहयोगको अभ्यास शुरु गरेका छन् ।
वडा नं ६ को वडा कार्यालयले वडाबासी नागरिकको मृत्यु भएमा राहत रकमसहित मृत्यु दर्ता प्रमाण पत्र घरमै पुरयाएर सम्बन्धित परिवारलाई हस्तान्तरण गर्न शुरु गरेको हो ।
कतिपय मृतक परिवारले आफ्नो परिवारका सदस्यको मृत्यु भए पनि कार्यालय सम्म पुगेर सो घटना अर्थात मृत्यु दर्ता नगरेको पाइएकोले पनि शोकको घडीमा वडाका अभिभावक जनप्रतिनिधिहरु स्वयं मृतक परिवारमा पुगेर कार्यालयबाट जारी गरिनु पर्ने मृत्यु दर्ता प्रमाण पत्र दिन थालिएको वडाध्यक्ष मनोज खुलाल कार्कीले बताउनु भयो ।
८ श्रावणमा निधन भएकी सो वडाकी माया दमाईको परिवारलाई वडाध्यक्ष कार्कीसहितको वडाको टोलीले घरमै पुगेर मायाको मृत्यु प्रमाण पत्रसँगै उनका पति दधिराम दमाईलाई वडाका तर्फबाट समवेदना पत्र र राहत सहयोग रकम प्रदान गरियो । वडाले वडाबासीको मृत्यु भएमा ४ हजार ५सय रुपैयाँ राहत रकम दिने गरेको छ । वडा सदस्य गीता दर्जी, नरेन्द्र बस्नेत, गंगा ताजुरिया र वडा सचिव सन्तोष रिमाललगायत उपस्थिति रहेको थियो ।
नवौ पुन्य तिथीका दिन वडा कार्यालयको तर्फबाट स्वर्गीय मायाको परिवारसँग भेटघाट गर्न पुगेका वडाध्यक्ष कार्कीले भने, हामीले जे जति कार्यक्रमहरु ल्यायौं ती जनमुखी कार्यक्रम छन् ।
