झापा / नेपाली कांग्रेसका नेता कृष्ण प्रसाद सिटौलाले जनताका साझा मुद्धा समाधानका लागि सबै राजनीतिक दलहरु एक ठाउँमा उभिनु पर्ने आवश्यकता औंल्याउनु भएको छ ।
नेपाली जनताको त्याग र समर्पणबाट प्राप्त उपलब्धीहरुको रक्षा गर्नु राजनीतिक दलहरुको साझा कर्तव्य भएको उहाँको भनाई छ ।
कांग्रेसका पुर्व महामन्त्री तथा राष्ट्रियसभामा संसदीय दलका नेता समेत रहनु भएका सिटौलाले नेपाल किसान महासंघ कोशी प्रदेशको पहिलो अधिवेशन आज दमकमा उदघाटन गर्दै त्यस्तो बताउनु भएको हो ।
सिटौलाले अहिले कोही सत्ता पक्ष र प्रतिपक्ष नभई एकै ठाउँमा उभिनुपर्ने अवस्था रहेको बताउनु भयो ।
खेतीपाती गर्ने किसानहरु नोक्सानीमा जान नहुने भन्दै उहाँले किसानहरुले नोक्सान ब्यहोर्नुपर्ने अवस्था आए उनीहरुलाई नाफामा पुर्याउने दायीत्व सरकारको भएको बताउनु भयो ।
कार्यक्रममा बिशिष्ट अतिथी कांग्रेस केन्द्रिय सदस्य राजिब ढुंगानाले अहिले निर्वाहमुखी खेती भईरहेको भन्दै यसलाई ब्यवसायमुखी बनाउने दायीत्व सरकारको भएको बताउनु भयो ।
नेपाल कृषि प्रधान देश भनिए पनि त्यस अनुसारको नीति निर्माण हुन नसक्दा कृषि पेशा हेलाको पेशा बनिरहेको उहाँले बताउनु भयो ।
त्यसैगरी कांग्रेस केन्द्रिय सदस्य गोमा भट्टराईले कृषकका मुद्धा उठाउने पार्टी नेपाली कांग्रेस मात्रै भएको बताउनु भयो ।
कांग्रेस संस्थापक नेता वीपी कोईरालाले कृषकलाई हेरेरनै पार्टी स्थापना गरेको भन्दै उहाँले अहिले पनि बिपिको त्यो परिकल्पना साकार नभएको बताउनु भयो ।
त्यसैगरी पार्टीका पुर्व केन्द्रिय सदस्य तथा संबिधानसभा सदस्य सुधिर कुमार शिवाकोटीले कृषि प्रधान मुलुक भनिए पनि बिदेशबाट खाद्यान्न ल्याउनु पर्ने बाध्यता रहेको भन्दै त्यसलाई अन्त्य गर्नु पर्ने अहिलेको आवश्यकता रहेको बताउनु भयो ।
अधिवेशन उद्घाटन कार्यक्रममा कांग्रेस कोशी प्रदेश महामन्त्री उमेश थापा, सह महामन्त्री खड्ग फागो, पार्टीका झापा जिल्ला सभापति देउकुमार थेवे, सुनसरी जिल्ला सभापति केदार भण्डारी, कांग्रेस झापा क्षेत्र नम्बर ५ का क्षेत्रीय सभापति ढुण्डीराज भण्डारी, नेपाल किसान महासंघ केन्द्रिय सदस्य सिताराम भट्टराई, भोजपुर अध्यक्ष ईन्दिरा प्रधान, ताप्लेजुङ्ग अध्यक्ष भिम बहादुर गुरुङ लगायतले अधिवेसन सफलताको सुभकामना मन्तव्य राख्नु भएको थियो ।
