दमक/ दमक बजारमा विक्रीका लागि ल्याइने हरियो तरकारीमा बिषादीको परीक्षणलाई स्थानीय सरकारले निरन्तरता दिएको छ । स्थानीय सरकार अन्तर्गतको बजार अनुगमन समितिले दमकको नयाँ तरकारी बजारमा संकलन गरेको तरकारीको नमुना परीक्षण पर्याप्त नभए पनि उपभोक्ताहरुलाई सजग गराउन भने यसले महत्वपूर्ण योगदान पुगेको नगरपालिकाको भनाई छ ।
नगरपालिकाको बजार अनुगमन समितिले विषादी अवशेष द्रुत विश्लेषण प्रयोगशाला एकाई विर्तामोडको प्राविधिक सहयोगमा दमक बजारमा विक्री वितरण गरिने ताजा तरकारी तथा फलफूलको नमुना संकलन गरेकोमा यहाँ उपलब्ध रायो सागमा बिषादीको मात्रा उच्च रहेको पाइएको छ । सो बारे दमक नगरपालिकाको बजार अनुगमन शाखाले आज पत्रकार सम्मेलन गरी जानकारी गराउँदै बजार अनुगमनको पक्षलाई निरन्तरता दिइएको जनाएको छ । मोरङको भाउन्ने क्षेत्रमा उत्पादन भएको भनिएको रायो सागमा अत्याधिक मात्रामा कार्वामेट र अर्गानो फस्फेट पाईएकाले दमक नगरपालिकाले जफत गरेको पनि पत्रकार सम्मेलनमा जनाइएको छ ।
अनुगमन टोलीलाई सो रायो सागको स्रोत सम्बन्धित व्यापारीलेनै उपलब्ध गराएका हुन् । रायो सागमा देखिएको सो बिषादीका बारेमा उत्पादन भएको क्षेत्र भनिएको मोरङको बेलबारी नगरपालिकालाई पनि औपचारिक जानकारी गराइएको बजार अनुगमन संयोजक समेत रहेकी दमक नगर उपप्रमुख रेगिना भट्टराईले जानकारी दिइन् । उनले बजार आम उपभोक्ताको हितमा हुनुपर्ने स्थानीय सरकारको नीति रहेको स्पष्ट पार्दै उपभोक्ता हित विपरित हुने क्रियाकलाप रोक्न आवश्यक कानुनी कारवाही अघि बढाइने पनि चेतावनी दिइन् ।
दमक नगर प्रमुख रामकुमार थापाले बजारमा कानुन विपरीत र आम उपभोक्ताको स्वास्थ्यमा खेलबाँड गर्ने गरी हुने उपभोक्ता हित विपरितका जुनसुकै काम पनि रोक्न स्थानीय सरकार प्रयत्नशील रहेको जानकारी गराए ।
सो अवसरमा नगरपालिकाका प्रशासकीय अधिकृत यज्ञ निरौला, खाद्य अनुगमन अधिकृत लक्ष्मी न्यौपाने, कृषि शाखा प्रमुख चन्द्रकला भट्टराई लगायतको पनि उपस्थिती थियो ।
