दमक/ नेपाली कांग्रेसको आसन्न १५ औं महाधिवेशनको कार्यतालिका सार्वजनिक भएसँगै झापाको दमकमा पनि कांग्रेसको स्थानीय नेतृत्व सर्वसम्मत चयन गर्न नेतृत्वले आन्तरिक कसरत अघि बढाएका छन् ।
पार्टीको नगर सभापतिका आकांक्षी (सम्भावित उम्मेदवार)हरु एकपछि अर्को गर्दै बढ्न थालेपछि पार्टी नेताहरुले आन्तरिक एकतामा जोड दिँदै साझा र सर्वसम्मत नेतृत्व कसले लिन सक्ला भन्दै आन्तरिक बहस र छलफल गरिरहेका छन् ।
अघिल्ला महाधिवेशनहरुमा भन्दा फरक यस पटक दमक नगरमा नेतृत्वका लागि खासै गुटगत प्यानलहरु खडा गर्न खोजिएको छैन ।
विशेष गरी कांग्रेस दमक नेतृत्वमा अघिल्ला नेतृत्वहरुले प्यानल खडा गर्ने र समुह समुह बनाएर कार्यकर्ता डोहोरयाउने गरेकोमा यसपटक आन्तरिक एकताको आवश्यकता महसुस गरेर नेताहरु सके सर्वसम्मत नेतृत्वको कसरतमा लागेका हुन् ।
नगर समितिका हालका पदाधिकारीहरु तथा वडा सभापतिहरु समेत नगर सभापतिका आकांक्षी भएको बुझेपछि यहाँ नगर सभापतिका लागि सर्वसम्मत साझा नेतृत्व खोज्ने प्रयास भइरहेको बताइएको छ ।
नेपाल तरुण दलको क्षेत्रीय नेतृत्व सम्हालिरहेका र नयाँ पुस्तादेखि पाको पुस्तासम्म सहज रुपमा जोडिन सक्ने नेताका रुपमा लोकप्रिय तरुण नेता गोकूल श्रेष्ठलाई सर्वसम्मत नगर सभापति बनाएर अघि बढाउन मध्यमार्गी प्रस्तावमाथि नेताहरुले छलफल चलाइरहेका छन् । यस अघि नगर सभापतिका आकांक्षी नेताहरुलाई अन्य बैकल्पिक स्थानमा व्यवस्थापन गर्दै युवा पुस्ताबाट अधिकतम कार्यकर्ताहरुको भावना बुझ्ने नेतृत्वका रुपमा श्रेष्ठको नाम प्रस्ताव भएको बताइएको छ । यस बिषयमा युवा नेता श्रेष्ठ स्वयं भने खुल्न चाहेका छैनन् । नाम प्रस्ताव हुनु मात्रै ठुलो कुरा होइन सबैका लागि मान्य नाम हुनुचाहिं ठुलो बिषय हो– श्रेष्ठले आफ्नो नाम पार्टी भित्र चर्चामा आउनुलाई आफूले सामान्य रुपमा लिएको बताउँदै भने ।
श्रेष्ठ दमक उद्योग वाणिज्य संघको अध्यक्ष हुँदै हाल नेपाल उद्योग वाणिज्य महासंघको केन्द्रिय सदस्य समेत छन् । दमक १ निवासी श्रेष्ठ पार्टीको केन्द्रीय राजनीतिमा सोझै पहुँच राख्ने हैसियत भएको र कार्यकर्ताहरुमाझ मिलनसार र लोकप्रिय मानिन्छन् ।
