दमक/ इलाका प्रशासन कार्यालय दमकमा कार्यरत अधिकृत सूर्यमान बाँनिया सेवाबाट अनिवार्य अवकाश भएका छन् ।
दमक ५ निवासी बाँनिया ५८ बर्षे उमेर हदका कारण पुष २० देखि सेवाबाट अनिवार्य अवकाश भएका हुन् । शिक्षण पेशाबाट जागिरे जिवन शुरु गरेका बाँनियाले २६ बर्ष ६ महिना निजामती सेवामा आफूलाई समर्पित गरे ।
उनले सेवा क्षेत्रमा रहँदा इलाका प्रशासन कार्यालय गौरीगञ्ज र इलाका प्रशासन कार्यालय उर्लाबारीमा शाखा अधिकृतका रुपमा जिम्मेवारी निर्वाह गरेका थिए । आफू सेवाबाट अनिवार्य अवकाश भएको ब्यहोरा सामाजिक सञ्जाल मार्फत सार्वजनिक गर्दै बाँनियाले सेवा अवधिमा आफूलाई प्रत्यक्ष अप्रत्यक्ष रुपमा सहयोग पुरयाउने सबैलाई स्मरण गरेका छन् ।
ताप्लेजुङको मेहेलेमा जन्मिएका बाँनिया झापामा आएर बिद्यालय तहको अध्ययन पुरा गर्दै दमक बहुमुखी क्याम्पसमा उच्च शिक्षा हासिल गरेका व्यक्तित्व हुन् । उनले सेवाक्षेत्रमा रहँदा इलाका प्रशासन कार्यालय दमकको हालको नयाँ प्रशासनिक भवन निर्माणसँगै यस क्षेत्रको बिकासमा प्रत्यक्ष अप्रत्यक्ष रुपमा सक्रिय योगदान गरेका छन् । सेवाग्राही मैत्री व्यवहार र सहयोगी भावनाका कारण उनले समाजमा सकारात्मक योगदान गरेका छन् ।
