दमक/ दमक जेसीज बर्ष २०२६ को पदस्थापनसँगै सपथग्रहण कार्यक्रम शनिबार सम्पन्न भएको छ ।
युवाहरुको व्यक्तित्व र नेतृत्व बिकासमा सशक्त भुमिका निर्वाह गर्दै आएको दमक जेसीजको बर्ष २०२५ का अध्यक्ष सहदेव भट्टराईले बर्ष २०२६ का नवनिर्वाचित अध्यक्ष राजेन्द्र बिमलीलाई अध्यक्षको पदहस्तान्तरण गरे ।
कोशी प्रदेश सरकारकी भौतिक पूर्वाधार, यातायात तथा निर्माण राज्य मन्त्री शोभा चेम्जोङ पालुङवाको प्रमुख आतिथ्यमा भएको औपचारिक कार्यक्रममा राज्यमन्त्री पालुङवाले जेसीजका माध्यमबाट समाजमा सकारात्मक बिकासको लागि योगदान पुग्ने विश्वाससहित शुभकामना राखेकी थिइन् ।
कार्यक्रममा दमक नगरपालिकाका प्रमुख रामकुमार थापाले दमक जेसीजको महत्वपूर्ण योजनाका लागि नगरपालिकाले १० लाख रुपैयाँ बजेट विनियोजन गरेको भन्दै परिस्थिती सहज भएपछि थप सहयोग गर्दै जेसीजको संस्थागत बिकासमा सहयोग गर्ने प्रतिबद्धता जनाए । अर्का वक्ता नेपाल उद्योग वाणिज्य महासंघका केन्द्रिय कार्यकारिणी सदस्य गोकूल श्रेष्ठले समाजलाई नकारात्मकताबाट सकारात्मकताको बाटोमा डोहोरयाउन र विधिको शासन लागू गराउन जेसीजको भुमिका महत्वपूर्ण रहँदै आएको उल्लेख गरे ।
दमक उद्योग वाणिज्य संघका अध्यक्ष गोपाल गुरागाइँले दमक जेसीज र दमक उद्योग वाणिज्य संघ एकापसमा सहकार्य र हातेमालो गर्दै यहाँको आर्थिक र सामाजिक बिकासमा योगदान दिन तयार रहेको बताए । उनले दमक जेसीजलाई विभिन्न कार्यक्रमहरु सञ्चालन गर्न दमक उद्योग वाणिज्य संघले आफ्नो सभाहल निशुल्क उपलब्ध गराउने पनि अध्यक्ष गुरागाइँले घोषणा गरे ।
यसअघि गएको पुषमा भएको दमक जेसीजको निर्वाचन प्रकृयाबाट बिमली जेसीज अध्यक्षमा निर्वाचित भएका थिए ।
अध्यक्ष बिमलीले शनिबारनै आफ्नो टिमलाई सशक्त र प्रभावकारी ढंगबाट जेसीज उद्धेश्य र लक्ष्य अनुसार अघि बढाउन विभिन्न पदहरुमा मनोनयन गर्दै बोर्डलाई पूर्णता दिएका छन् । महासचिवमा रुवल अधिकारी, कानुनी सल्लाहकारमा बिशाल अधिकारी, कोषाध्यक्षमा सन्ध्या बराल, प्रकरण निर्देशकमा सुमन कुमाल र सचिवमा धर्म ढुंगानालाई मनोनित गरिएको अध्यक्ष बिमलीले घोषणा गरे । यस अघि पुषमा भएको निर्वाचन प्रकृयाबाट निर्विरोध रुपमा कार्यकारिणी उपाध्यक्षमा साजन श्रेष्ठ र कृष्ण भट्टराई, उपाध्यक्षहरुमा आभुषण भट्टराई, सरिता आचार्य, कुमारबाबु गजुरेल र मनिष श्रेष्ठ निर्वाचित भएका थिए । त्यस्तै जनसम्पर्क अधिकारीमा राहुल साह र तालिम निर्देशकमा पंकज पोखरेल निर्वाचित भएका थिए ।
पदस्थापन कार्यक्रममा कार्यक्रम संयोजक धर्म ढुंगानाले स्वागत मन्तव्य राखेका थिए भने कार्यक्रमको सञ्चालन नवनियुक्त महासचिव रुवल अधिकारीले गरेका थिए । कार्यक्रममा साजन श्रेष्ठले धन्यवाद मन्तव्य राखेका थिए ।
