दमक/ आगामी फागुन २१ गते हुन लागेको प्रतिनिधिसभा सदस्य निर्वाचनलाई लक्षित गर्दै झापा निर्वाचन क्षेत्र नम्बर ४ मा नेपाली कांग्रेसका उम्मेदवार देउकुमार थेवे आफ्नै निर्वाचन क्षेत्रका गाउँघरमा पुगेर नागरिकहरुसँग साक्षात्कार गरिरहेका छन् ।
मतदाताको धारणा बुझ्ने र आफ्ना योजना सुनाउने अभियानमा नेता थेवे यो सहित तेस्रो पटकको चुनावमा उम्मेदवारका रुपमा मैदानमा उत्रिएका हुन् ।
‘चुनाव आउँछ–जान्छ, तर म सधैँ गाउँघरमै हुन्छु, नागरिकका दुःख–सुखमा साथ दिँदै आएको छु,’ उनले भने– ‘त्यसैले क्षेत्र नं ४ भित्रका गाउँ बस्ती मेरो लागि नयाँ होइनन् ।’
यसअघिको निर्वाचनमा मतदाताको पर्याप्त विश्वास जित्न नसक्दा एउटा सांसदको रुपमा आफूले चाहेको काम गर्न नपाएको स्वीकार गर्दै थेवेले एउटा सामाजिक , राजनीतिक नेतृत्व हुनुका नाताले भने सधैं क्षेत्र नं ४ कै भुगोलमा क्रियाशील रहेको स्मरण गरे । मत परिणाममा पराजित हुँदा पनि यो ठाउँलाई सधैं आफूले मन मुटुमा राखेका कारण यसपटक भने मतदाताले वास्तविकता बुझेर मतदान गर्ने विश्वास लिएको थेवेले बताए । ‘अब जनता सचेत छन्, को केका लागि उठेको हो भन्ने कुरा बुझिसकेका छन्,’ उनले भने ‘त्यसैले म ढुक्क छु ।’
उनले यसै निर्वाचन क्षेत्रमा पर्ने तत्कालिन कुमरखोद गाउँ विकास समितिमा दुई पटक अध्यक्ष भएर गरेका विकास तथा सामाजिक कामहरू नागरिकले अझै स्मरण गरिरहेको उल्लेख गर्दै कांग्रेसको संगठन यस क्षेत्रमा बलियो रहेको र कार्यकर्ताको सक्रियताले पनि आफूलाई थप आत्मविश्वास बढाएको उल्लेख गरे ।
नेपाली कांग्रेस झापाका सभापति समेत रहेका थेवेले प्रतिनिधिसभा निर्वाचनमा उम्मेदवार बन्नु ठूलो जिम्मेवारीको विषय भएको बताउँदै स्वास्थ्य, शिक्षा, सामाजिक सेवा र स्थानीय पूर्वाधार विकासलाई आफ्नो मुख्य चुनावी एजेन्डा बनाएको जानकारी दिए ।
घरदैलो अभियानका क्रममा मतदाताबाट सकारात्मक प्रतिक्रिया पाइरहेको भन्दै थेवेले कांग्रेस परिवर्तन भएर अघि बढेको सन्देश नागरिकले बुझिसकेको दाबी गरे । ‘पदमा नरहे पनि मैले गरेको कामको मूल्यांकन जनताले गरिरहेका छन्,’ उनले भने ।
थेवे यसअघिका दुई निर्वाचनमा लगातार नेकपा एमालेका लालप्रसाद (एलपी) साँवासँगको चुनावी प्रतिस्पर्धामा पराजित हुँदै आएका नेता हुन् । तेस्रो पटक पनि यो क्षेत्रमा साँवा र थेवेबीच प्रतिस्पर्धाको अनुमान चलिरहेको छ । यो क्षेत्रमा नेपाली कम्युनिष्ट पार्टीका तर्फबाट पुरुषोत्तम चुँडाल (राजु) , रास्वपाका शम्भु ढकाल, नेकपा माओवादीका ताराबहादुर थापा, उज्यालो नेपाल पार्टीका सन्तोष तामाङ लगायत उम्मेदवार चुनावी प्रतिस्पर्धामा उत्रिएका छन् ।
