झापा/ नेपाली कांग्रेसका उपसभापति विश्वप्रकाश शर्माले सर्लाही र झापा जोडेर विपक्षीहरुले फैलाएको भ्रमलाई मतदान मार्फत झापा ५ का मतदाताले जवाफ दिने बताएका छन् ।
चुनावी दौडाहाको सिलसिलामा सोमबार साँझ झापाको दमकमा आएका नेता शर्माले पार्टी कार्यालयमा आयोजित अगुवा नेता, कार्यकर्ताहरुको भेलालाई सम्बोधन गर्दै सामाजिक सञ्जालमा झापा ५ र सर्लाही ४ लाई जोडेर आएका भ्रमपूर्ण सूचना सामग्रीमा कुनै सत्यता नरहेको प्रष्ट पारे ।
उनले यसपटक झापा ५ का मतदाताले प्रायोजित, नियोजित रुपमा चलाइएका भ्रमपूर्ण समाचारहरु, फेक न्यूजहरुलाई पनि चुनौती दिने विश्वास व्यक्त गर्दै भने– यसपटक मिडियाहरुको नजरमा नपरेको वा नपत्याएको उम्मेदवारले झापा ५ मा चुनाव जित्दै हुनुहुन्छ ।
सबैलाई भन्नु होस कि नपत्याउने खोलाले बगाउँछ । नेता शर्माले भने– कांग्रेसले १६५ वटै क्षेत्रमा उम्मेदवार उठाएको छ । कांग्रेसजन र कांग्रेसका समर्थक, शुभचिन्तकहरु कसैले पनि अरु चिन्हमा भोट हाल्न पर्दैन र हाल्ने छैनन् त्यही सन्देश दिन म अहिले दमकमा आएको हुँ ।
उनले भावी प्रधानमन्त्रीको रुपमा कांग्रेसले सभापति गगन थापालाई अघि बढाएको,देशैभर १०६ जना उम्मेदवार नयाँ अनुहार उठाएको र कांग्रेस व्यवहारमै रुपान्तरित भएर आएको पार्टी भएकाले अब कांग्रेसको विकल्प कांग्रेसनै हो भन्ने सन्देश गएको प्रष्ट पारे ।
झापाको क्षेत्र नं ५ मा नेपाली कांग्रेसले सामाजिक अभियान्ताको पहिचान बनाउन सफल महिला नेतृ मन्धरा चिमरिया पौडेललाई प्रतिनिधि सभा सदस्यको उम्मेदवार बनाएको छ । यो क्षेत्रमा एमालेका केपी ओली र रास्वपाका बालेन्द्र साह प्रतिस्पर्धी भन्दै मिडियाहरुले कांग्रेससहित अन्य दलका उम्मेदवारहरुलाई पत्रकारिताको मूल्य मान्या विपरित अवमुल्यन गरिरहेको प्रति लक्षित गर्दै नेता शर्माले यस्तो बताएका हुन् ।
पार्टी क्षेत्रीय सभापति ढुण्डीराज भण्डारीको सभापतित्वमा भएको सो कार्यक्रममा कांग्रेस केन्द्रिय सदस्य सुरेश सुब्बा, गौरादह नगर सभापति यादवराज सेढाइँ, कमल गाउँ समिति उपसभापति पदमबहादुर निरौला लगायतले प्रतिनिधिमूलक रुपमा आआफ्नो भुगोलमा चुनावी अवस्था र गतिबिधिहरुका बारेमा रिपोर्टिङ गरेका थिए ।
