दमक/ झापा निर्वाचन क्षेत्र नम्बर ५ मा नेपाली कांग्रेसबाट उम्मेद्वार बनेकी मन्धरा चिमरिया पौडेलको पक्षमा ग्रामीण क्षेत्रका आदिवासी महिलाहरूले उल्लेख्य समर्थन जनाएपछि उत्साहित बनेकी छिन् ।
महिला तथा बालबालिकाको क्षेत्रमा लामो समयदेखि सामाजिक अभियन्ताका रूपमा सक्रिय मन्धरा उम्मेद्वार बनेर गाउँ–गाउँमा महिलाहरुलाई प्राथमिकता दिदैं भेटघाटमा पुग्दा उनीहरुले एक ढिक्का भएर समर्थन जनाएका छन । यसले उनलाई उत्साह बढाएको प्रतिक्रिया दिएकी छिन् ।
दमक र गौरादहमा समेत रहेका अस्पतालकी सञ्चालकसमेत रहेकी पौडेलले यसअघि ग्रामीण क्षेत्रबाट उपचारका लागि आउने विपन्न समुदायका नागरिकलाई उपचार र सेवामा प्रत्यक्ष, अप्रत्यक्ष रुपमा गरेको सहयोगको महिलाहरुले प्रशंसा गर्दै राजनीतिक आस्था र विचार भन्दा माथि उठेर समाजसेवामा क्रियाशील मन्धरालाई सहयोग गर्ने बचन दिए । दमकको अनाथ बाल वृद्धाश्रमको अध्यक्षका रूपमा अभिभावकबिहिन बेवारिसे बालबालिकाको अभिभावकत्व ग्रहण गर्दै संरक्षण र हेरचाहमा समेत उनको महत्वपूर्ण भूमिका छ ।
सामाजिक र महिलाहरुको न्यायका क्षेत्रमा गरेको योगदानका कारण यस क्षेत्रका असहाय तथा विपन्न समुदायको अभिभावकका रूपमा परिचित पौडेल उम्मेद्वार बनेर गाउँमा भेटिँदा मतदाताहरू उत्साहित देखिएका हुन् ।
आज झापाको गौरिगञ्जमा आयोजित कार्यक्रममा ठूलो संख्यामा आदिवासी महिलाहरूको उपस्थिति रहेको थियो । नेपाली कांग्रेसका केन्द्रीय सदस्य सुरेश सुब्बाको प्रमुख आतिथ्यमा आयोजित कार्यक्रममा पौडेलको सामाजिक योगदान नै उनको जितको बलियो आधार भएको बताए । यसअघि गरेका सामाजिक कामले पौडेललाई चिनाएको उल्लेख गर्दै सुब्बाले मन्धरा पौडेल यस क्षेत्रका असहाय र विपन्न समुदायको अभिभावक भएको धारणा व्यक्त गरे ।
कार्यक्रममा उम्मेदवार पौडेलले यस क्षेत्रका नागरिकबाट पाएको माया र समर्थनले आफू थप उत्साहित भएको बताइन् । नेपाली कांग्रेस झापा जिल्ला कार्यबाहक सभापति शेरबहादुर भट्टराईले अन्य दलले धेरै हल्ला गरे पनि कांग्रेसले असली स्थानीय र सामाजिक अभियान्तालाई उम्मेद्वार बनाएकोले जिततर्फ अग्रसर रहेको बताए ।
कार्यक्रममा कांग्रेस क्षेत्रीय सभापति ढुण्डीराज भण्डारीले सामाजिक सञ्जालहरुमा विपक्षीहरुले अनेकौं तडकडक र काल्पनीक मत सर्वेक्षणहरु राखेर निर्वाचन आचारसहिंताको उल्लंघन गर्दै महिला उम्मेदवारमाथि अन्याय गरिरहेको भए पनि मतदाताले न्याय गर्ने विश्वास व्यक्त गरे । सो अवसरमा महासमिति सदस्य रोहितकुमार शाह, महिला संघ झापाकी उपसभापति नौतली राजवंशी, प्रदेश प्रतिनिधि दीक्षा कोइराला घिमिरे लगायतले मन्तव्य राखेका थिए ।
