दमक/ नेपाली कांग्रेसले आसन्न फागुन २१ मा हुने प्रतिनिधि सभा सदस्यको निर्वाचनमा देशभर ११ जना महिलालाई प्रत्यक्ष तर्फको चुनावी प्रतिस्पर्धामा उतारेको छ ।
देशभरका १६५ वटैनिर्वाचन क्षेत्रमा पार्टीका आधिकारिक उम्मेदवार लिएर चुनावमा होमिएको कांग्रेसले प्रत्यक्ष तर्फ ११ महिलालाई उठाउँदै गर्दा झापाका दुई वटा क्षेत्रमा महिला नेतृहरुले अवसर पाएका छन् ।
राष्टिय अन्तराष्टिय स्तरमा चर्चामा रहेको झापा ५ मा सबै दलहरुले पुरुष उम्मेदवार मात्रै उठाइरहँदा कांग्रेसले भने लामो समयदेखि स्थानीयस्तरमा रहेर महिला बालबालिकाको हक अधिकार र न्यायका क्षेत्रमा प्रत्यक्षमा रुपमा क्रियाशील मन्धरा चिमरिया पौडेललाई उम्मेदवार बनाएपछि यहाँको चुनावी माहोल थप उत्साहित बनाएको छ भने क्षेत्र नं २ मा सरिता प्रसाइँलाई उम्मेदवार बनाएको छ ।
चिमरिया पूर्व प्रधानमन्त्री समेत रहेका एमाले अध्यक्ष केपी शर्मा ओलीसँग चुनावी प्रतिस्पर्धामा छिन भने प्रसाइँ पूर्व सभामुख समेत रहेका एमाले नेता देवराज घिमिरे र रास्वपाका तर्फबाट पुर्व उपसभामुख समेत रहेकी इन्दिरा रानामगर सँग त्रिपक्षीय प्रतिस्पर्धामा छिन् ।
झापा जिल्लाका कूल पाँच निर्वाचन क्षेत्र मध्ये सबैभन्दा धेरै महिला मतदाता भएको क्षेत्र नं ५ मा कुनै पनि दलले महिलालाई अवसर दिएका छैनन् ।
महिलाहरुलाई हरेक क्षेत्रमा अगाडी बढ्नु पर्छ भनेर मुखले बोल्ने र व्यवहारमा अवसरनै नदिने नयाँ/ पुराना सबै दलहरुको अभ्यासलाई तोड्दै कांग्रेसले यो क्षेत्रमा मन्धरालाई उम्मेदवारका रुपमा घरदैलोमा लिएर जाँदा अधिकांश महिला मतदाताहरु उत्साहित बनेका छन भने उम्मेदवार चिमरियाले झापा ५ मा आफूले यसलाई आम उत्पीडित, ग्रामिण , अल्पसंख्यक, दलित, विपन्न , थिचिएका र मिचिएका , महिलाहरुको साथ सहयोगबाट अरुले भन्ने गरेका हेभिवेटलाई मत मार्फत पछारेरै छाड्ने उदघोष गरिन् ।
उनले ति महिला हुन वा पुरुष सबैको समान न्यायका लागि नीतिगत पहल गर्न पाउने अवसरका रुपमा यसलाई लिएको पनि बताइन् ।
राज्यका निकायहरुमा महिलाका मुद्धाहरुलाई स्थापित गर्न , नीति निर्माणको थलो संसदमा महिला मुद्धा सम्बोधन गराउन राजनीतिमा महिला सहभागिता अनिवार्य बढाइनु पर्ने बहस चलिरहँदा मन्धराको उम्मेदवारी चुनौतीसँगै आएको एक महत्वपूर्ण अवसर भएको बुझाई छ दमक नगरपालिकाकी उपप्रमुख रेगिना भट्टराई (प्रसाइँ)को ।
हेभिवेटसँग महिलालाई प्रतिस्पर्धा गराइनुलाई कतिपयले नकारात्मक रुपमा टिप्पणी गर्ने गरेको भएता पनि आफ्नो बुझाईमा यसले झापा ५ मा महिलालाई लैंगिक एकता र अधिकारको बिषयमा थए एकताबद्ध र संगठित बनाउँदै चुनौतीलाई पन्छाउन बल पुग्ने आफ्नो निष्कर्ष रहेको भट्टराईको बुझाई छ ।
राष्ट्रिय महिला अधिकार मञ्चकी दमक नगर अध्यक्ष समेत रहेकी नेतृ रमा लिम्बु महिलाका लागि अवसर र चुनौती जहिले पनि संगसंगै आउने गरेको बताउँदै भन्छिन– उहाँ (मन्धरा दिदी)को उम्मेदवारीले पनि त्यही कुरा देखाएको छ हामी एकढिक्का भएर संसद सम्म पठाउनेछौं ।
यस क्षेत्रका महिलाहरुले यहाँ उम्मेदवारीको अवसर पाएपछि महिला उम्मेदवार , साझा उम्मेदवार, भोट दिऔं महिलालाई, भबिष्य सबैलाई … जस्ता नारा लगाएका छन् । गौरीगञ्जकी मतदाता रिनादेवी साह महिला उम्मेदवारलाई जिताउनु हामी महिलाहरुको कर्तव्य हो , हामी त्यही अठोट लिएर खटिएका छौं ।
उम्मेदवार चिमरिया महिलाहरुमा पनि अवसर सबैलाई हुनुपर्ने सोच राखेर मेरो उम्मेदवारी एकैपटक , यसैपटक ….भन्दै मतदाताहरुमाझ गइरहेकी छिन् ।
चिमरिया राजनीतिक रुपमा कांग्रेसको महासमिति सदस्य छिन् भने महिला अधिकारका क्षेत्रमा क्रियाशील राष्ट्रिय महिला अधिकार मञ्चकी केन्द्रिय उपाध्यक्ष पनि हुन् । झण्डै तीन दशकदेखि निरन्तर महिला बालबालिकाका क्षेत्रमा नेतृत्व गर्दै आएकी मन्धराले व्यक्तिगत पारिवारिक जिवनमा समेत संघर्षपूर्ण र पीडादायी घटनाहरु ब्यहोर्दै पनि अनवरत सामाजिक सेवामा क्रियाशील छिन् ।
विपन्न र जेहेन्दार बिद्यार्थीहरुलाई अध्ययनमा सहयोगका लागि उनले दमक बहुमुखी क्याम्पससहित विभिन्न सामुदायिक बिद्यालयहरुमा आफ्ना दिवंगत छोराको स्मृतिमा अक्षयकोष स्थापना गरेकी छिन भने धार्मिक मठ मन्दिर र संघ संस्थाहरुमा पनि अक्षय कोष र अन्य किसिमका सहयोग र सेवाका कामहरु गरेकी छिन् ।
उनकै नेतृत्वमा दमकमा अनाथ बाल आश्रम स्थापना गरेर ३० जना भन्दा बढी बालबालिकाहरुको संरक्षक बनेर अभिभावकत्व निर्वाह गरिरहेकी छिन् । निजी स्वास्थ्य संस्थाहरुमा उनले गरेको लगानी विपन्नहरुको उपचार सहयोगका लागि गतिलो माध्यम बन्दै आएको छ । निम्स नेशनल हस्पिटल, कोशी प्रदेश सामुदायिक अस्पताल दमक र मेडिम्याक्स हस्पिटल गौरादह मार्फत यो क्षेत्रका बासिन्दाले उपचार सेवामा सहुलियत पाइरहेका छन् ।
उम्मेदवार मन्धरा आफ्नो वडामा रहेको पशुपति संस्कृत माविको शिक्षक अभिभावक संघमा रहेर सामुदायिक बिद्यालयमा पनि योगदान दिँदै आएकी छिन् । निजी र सामुदायिक शिक्षण संस्था हुन वा स्वास्थ्य सेवा प्रदायक संस्थाहरु यि सबैका बीचमा समन्वय र सहकार्य गरेर मात्रै नागरिकहरुलाई चुस्त , दुरुस्त, पारदर्शी र प्रभावकारी सेवा दिन सकिने उनको ठम्याई छ ।
झापाको क्षेत्र नम्बर ५ मा महिला मतदाताको संख्या ८२ हजार २९६ र पुरुष मतदाताको संख्या ८१ हजार ८१ रहेको छ । त्यस्तै अन्य दुई मतदाता रहेका छन् । यस क्षेत्रमा ६१ वटा मतदानस्थल र १८५ वटा मतदान केन्द्र रहेका छन् ।
क्षेत्र नं ५ अन्तर्गत दमक नगरपालिकाका सबै वडा (१०) कमल गाउँपालिकाका सबै वडा (७) , गौरादह नगरपालिकाका ८ वटा वडा र गौरीगञ्ज गाउँपालिकाका ४ वटा वडा पर्छन् ।
