दमक/ दक्षिणवर्ती भारतीय सीमासँग जोड्ने झापाको दुधे– शिवगञ्ज – बोलोचोक कुञ्जीबारी – बोर्डर सडक बर्षौदेखि उपेक्षामा पर्दै आएको छ ।
हरेक निर्वाचनहरुमा दलहरु र ति दलका उम्मेदवारहरुको मत माग्ने साझा मुद्धा जस्तै बनेको करीब २५ किलोमिटर यो सडकको आशिंक खण्ड अर्थात जनता चोकदेखि दक्षिण तर्फ भारतसम्मको खण्डका उपभोक्ताहरुलाई मत माग्ने एजेण्डा अर्थात मुद्धाका रुपमा यो समस्या रहँदै आएको हो ।
यसअघि एशियाली बिकास बैंकको सहयोगमा पहिलो पटक करिब डेढ दशक अघि कालोपत्रे भएको सो सडक कालोपत्रे भत्किँदा आवागमननै रोकिने अवस्थामा छ भने सडक आसपासका उपभोक्ताहरुले धुलो, माटोमा दिनरात कटाउनु पर्ने बाध्यता छ । जनताबाट सालमारा सम्मको आशिंक खण्ड पछिल्लो समय कालोपत्रे गरिएको भए पनि त्यस भन्दा दक्षिण तर्फ बोलोचोक– ओडारी चोक– महाभारा कुञ्जीबारी हुँदै भारतीय बोर्डर सम्मको करिब १२ किलोमिटर खण्ड जीर्ण भएको बर्षौ बितेको छ ।
हरेक निर्वाचनमा यस क्षेत्रका नागरिकहरुमाझ यो सडक कालोपत्रे गर्ने योजनाको फेहरिस्त सुनाउने गरेका भए पनि यस क्षेत्रबाट निर्वाचन जितेर गएका तत्कालिन प्रतिनिधि सभा सदस्य एलपी साँवाले सो सडकमा ध्यान नदिएको गुनासो स्थानीयबासीको छ ।
तत्कालिन महाभारा गाविसका उपाध्यक्ष समेत भइसकेका देवेन्द्रनारायण राजवंशी दक्षिण भेगका नागरिकलाई यस क्षेत्रबाट जितेर संसदमा पुग्दै आएका सबैले ढाँट्ने गरेको बताए । यो सडक अन्तर्गत तत्कालिन पाँचगाछी र महाभारा गाविस (हाल शिवसताक्षी ४ र गौरीगञ्ज १ ) पर्छन् ।
यो क्षेत्रमा सताक्षीधाम–झिलझिले– जनता चौरी सडक हालसालै स्तरोन्नती भई कालोपत्रे गरिएको तर दैनिक तीन÷चार वटा यात्रुबहाक बस सञ्चालन हुँदै आएको सडक भने कालोपत्रे नगरिँदा बर्षा याममा यो सडक भएर आवतजावत गर्न सर्वसाधारणले ठुलो कष्ट ब्यहोर्नु परिरहेको छ ।
कुञ्जीबारीबाट भन्सार हुँदै भारतीय गाउँ डाकुपाडासम्म पुग्ने यो सडक फराकिलो बनाउन आसपास क्षेत्रका सर्वसाधारणले भोग्दै आएको जग्गा समेत उपलब्ध गराए पनि सडकको स्तरोन्नतीका लागि सरकारका कुनै पनि निकायले ध्यान दिएका छैनन् । यो खण्डलाई यसअघि केर्खा– क्याम्पा – सरङपाडा–बाह्रविघे हुँदै जोड्ने योजना रातो किताबमा समावेश गरिएको भए पनि बाह्रविघेदेखि दक्षिण तर्फ कुञ्जीबारी– बोर्डर सम्मको करिब ७ किलोमिटर खण्डमा सडक स्तरोन्नतीको काम शुन्य छ । यो योजनाको आंिशक खण्डका लागि छुटिएको बजेट समेत गएको बर्ष कटौती हुँदा कालोपत्रे योजना अघि बढ्न नसकेको हो ।
यो भुगोल अहिले झापाको संघीय निर्वाचन क्षेत्र नं ४ मा पर्छ । यो क्षेत्रबाट २०७४ र २०७९ को दुवै प्रतिनिधि सभा निर्वाचनमा एमालेका एलपी साँवा निर्वाचित भएका थिए । यही फागुन २१ मा हुने प्रतिनिधि सभा सदस्य निर्वाचनमा समेत साँवा यो क्षेत्रबाट उम्मेदवार बनेका छन् ।
यस क्षेत्रका नागरिकले हरेक बर्ष भोग्दै आएको खोला नदीको कटान र डुबान समस्याबाट मुक्त गराउने स्पष्ट योजना र प्रतिबद्धता कार्यान्वयनको सुनिश्चीतता र हुलाकी मार्ग अन्तर्गत १४ बर्षदेखि निर्माण पुरा हुन नसकेको कन्काई पक्की पूलको योजना, भोग्दै आएको जग्गाको स्वामित्व (धनीपूर्जा ) को समस्या र गुठी समस्यालाई पनि राज्यले कहिल्यै नसुनेको भन्दै आक्रोश पोखिरहेका छन् । उनीहरुले यस क्षेत्रका उल्लेखित समस्याहरुलाई साझा समस्याका रुपमा लिँदै मत माग्न आउने दल र उम्मेदवारहरु ति समस्याहरुबारे खुल्ला बहसका लागि तयार भएर आउन चेतावनी दिएका छन् ।
