दमक/ नेपाली कम्युनिष्ट पार्टीका तर्फबाट झापाको क्षेत्र नं ५ का प्रतिनिधि सभा सदस्य उम्मेदवारसँगको अन्तरक्रियामा दमक नगर इसाई समाजका तर्फबाट पाँच बुँदे सुझाव पेश भएको छ ।
उम्मेदवार रञ्जीत तामाङसहित पार्टी नेताहरुको उपस्थितीमा आज भएको अन्तरक्रियामा दमक नगर इसाई समाजका तर्फबाट विपद व्यवस्थापन समिति संयोजक युवराज गजमेरले धर्म निरपेक्षता कायम राख्नु पर्नेसहितका पाँच बुँदे सुझाव राखेका हुन् ।
गजमेरले धार्मिक क्षेत्रहरुमा राज्यका तर्फबाट गरिने लगानी समान रुपमा गर्ने नीति अवलम्बन गर्ने बिषयमा सुझाव राखे । बिद्युत महसुल अन्य धार्मिक संघ संस्थालाई लिने र चर्चहरुमा लिने दरमा फरक रहेकाले सो समेत समान हुनुपर्ने, ईसाई धर्मावलम्बीहरुको समाधिस्थल ( कपूरस्थान)का लागि जग्गा सुनिश्चित गरिनुपर्ने, राज्यद्वारा अनेपिक्षित धर्मपरिवर्तनको आरोप लगाई दुख दिने काम बंद गरिनुपर्ने र इसाईहरूको महान चाड पर्व हरुमा स्थायी बिदाको सुनिश्चिता गरिनुपर्ने पनि इसाई धर्मावलम्बीहरुको सुझाव छ । गजमेरले भने– ख्रीष्टमसमा यस बर्ष पनि बिदा त दिइयो तर हतारमा मध्यरातमा बिदाको निर्णय भयो । त्यस्तो होईन अब घोषित रुपमा क्यालेण्डरमा उल्लेखित बिदाको सुचीमानै ख्रीष्टमस पर्वलाई राखिनु पर्छ भन्ने हाम्रो मान्यता हो ।
