झापा/ नेकपा एमालेका अध्यक्ष केपी शर्मा ओली एकहप्तासम्म झापा ५ मा मतदाता भेटघाट गरेर काठमाडौं फर्किएका छन् ।
फागुन २१ गते हुने निर्वाचनका लागि माघ २३ गते निर्वाचन क्षेत्र झापा ५ आएका अध्यक्ष ओलीले तीनवटा पालिकाका करिब ८० वटा टोलका मतदातासँग साक्षात्कार गरेर बिहिबार काठमाडौं फर्किएका हुन् ।
निर्वाचन परिचालन कमिटीका कमाण्डर देवेन्द्र दाहालका अनुसार अध्यक्ष ओलीले एक साताका बीचमा गौरादह,कमल र गौरीगञ्ज गाउँपालिकाका टोल टोलमा मतदाताका स्याबासी,गुनासा र समस्या सुनेका छन् ।
दमक नगरपालिकाका १० वटै वडाका करिब ४० वटा टोलमा फागुन ४ गते पछि अध्यक्ष ओलीले मतदाता भेट्न जाने कार्यक्रम छ । ‘तीनवटा पालिकाका करिब ८० वटा टोलका मतदातासँग अध्यक्षले प्रत्यक्ष संवाद गर्नुभएको छ । मतदातासँग भेटेपछि उहाँ उत्साहित भएर फर्कनु भएको छ ’ संयोजक दाहालले भने ‘मतदाताले उहाँलाई खुलेर प्रश्न गरेका छन् । गुनासो राखेका छन् । समस्या सुनाएका छन् । र,राष्ट्र र राष्ट्रियताको पक्षमा अडान लिएकोमा धन्यवाद पनि दिएका छन् ।’
एमाले कमल गाउँ कमिटीका अध्यक्ष हरी ढकालका अनुसार कतिपय नेताहरु निर्वाचन जितेपछि भूगोलतिर नफर्किने भनेर आलोचना खेप्छन् । तर ओलीलाई त्यो समस्या छैन । ‘ निर्वाचन परिचालन कमिटीका सचिव नारायण गौतमका अनुसार कमल गाउँपालिकाका ३० वटा टोलमा अध्यक्षले भेटघाट गरेका छन् । भेटघाटमा मतदाताले स्थानीय ठाउँको विकास,रोजगारी,शिक्षा तथा अस्पताल निर्माणका मागहरु राखेका छन् । ‘अधिकांस मतदाताले स्थानीय विषयलाई नै प्रमुख मुद्धा बनाएर अध्यक्षसँग प्रस्तुत गरेका छन’ गौतमले भने ।
पश्चिम दक्षिण झापाको गौरादह ६ का मतदाता जयराम सापकोटाले एमाले अध्यक्ष ओलीसँग रतुवाको कटानमा परेका यस क्षेत्रका मतदाताले रतुवा खोलामा स्थायी तटबन्धन,यही खोलामा पक्की र झोलुंगे पुल र अस्पताल निर्माणको माग गरेका छन् । ‘अध्यक्षज्यूलाई हामीले स्कूलचौन दामुना जाने सडकलाई पिच गर्न,रतुवामा तटबन्धन गरेर बाढी र डुबानबाट बचाउन र यसै क्षेत्रमा सुविधा सम्पन्न अस्पताल स्थापना गरिदिन माग गरेका छौं’ सापकोटाले भने ।
यस्तै दामुना बजारका मतदाताले पार्टीका अन्तरविरोध मिलाइदिन,कार्यकर्तालाई जनतासँग जोडिन र सुशासनलाई व्यबहारमा उतार्न माग गरेका छन् ।
उनीहरुले स्थानीय तहका जनप्रतिनिधि,मुख्यमन्त्री लगायत यस क्षेत्रका जनप्रतिनिधिलाई जनता समस्यामा गम्भिर भइदिन सम्झाइदिन आग्रह गरेका छन् ।
वडा नं ६ कै सिंगीयाडुबाका बासिन्दाले अध्यक्ष ओलीलाई नेपाली कागजमा ६ बुँदे माग लिखित रुपमा नै पेश गरेका छन् । मागपत्र पेश गर्दै एमाले वडा कमिटीका उपाध्यक्ष दुर्गा गनगाईले दामुनाबाट सिंगियाडाँगी हुँदै सिंजुवा जाने बाटो पिच हुनु पर्ने र रतुवा खोलामा पक्की पुल निर्माण गर्न माग गरेका छन् । यसैगरी दामुनाबाट हुलाकी सडक जाने कृषि सडक पनि तत्काल पिच गरेर किसानका उत्पादनलाई भारतीय बजार पुर्याउन सहज बनाइदिनुपर्ने गनगाईंले माग गरे ।
गौरीगञ्ज गाउँपालिकाको सिमावर्ती क्षेत्र देवानगञ्जका मतदाताले मोइवालको टावर राखिदिन माग गरेका छन् । टावर नभएका कारण भारतीय टावरमा निर्भर हुनु परेको गुनासो उनीहरुले चर्काे रुपमा उठाएका छन् । सो क्षेत्रका मतदाताले आफ्नो गाउँ टोलमा फेरी फेरी आइदिन पनि माग गरेका छन् ।
गौरादह चैतुचोककी रमिला राजवंसीले ओलीलाई आफूलाई ठुला ठुला कुरा गर्नुभन्दा रोजगारी गरेर खाने मेलो मिलाइदिन माग गरिन ।
दक्षिण झापाको ग्वालडुब्बा निवासी एमाले प्रदेश कमिटी सदस्य अमर शिवाकोटीका अनुसार एकहप्तामा अध्यक्ष ओलीले हजारौं मतदातालाई भेटेका छन् ।
शिवाकोटी भन्छन ‘आफ्ना प्रतिनिधिलाई प्रश्न सोध्ने अधिकार हरेक मतदातालाई हुन्छ । प्रतिनिधिले मतदातालाई जवाफ दिने दायित्व पनि हुन्छ । अध्यक्षले हरेक प्रश्नको जवाफ दिनुभएको छ । ’
