शिवसताक्षी/ शिवसताक्षी नगरपालिका वडा नं. ६ स्थित चन्द्रडाँगी बजार हुँदै कनकाई नदीपूर्वमा रहेको वडा नं. १० र वडा नं. ७ को केही भू–भाग जोड्न कनकाई नदीमाथि झोलुङ्गे पूलको निर्माणको कार्य अन्तिम चरणमा पुगेको छ ।
संघीय सरकारको झोलुङ्गे पूल महाशाखा, कुपन्डोलबाट विनियोजित ७ करोड ४१ लाख रुपैयाँको लागतमा निर्माण सुरु गरिएको झोलुङ्गे पूलको लम्बाइ ६४० मिटर रहेको छ ।
शिवसताक्षी नगरपालिकाको भौगोलिक अवस्थिति अनुसार कनकाई नदीपूर्व पनि केही वडाहरु रहेका छन् ।
कनकाई नदीपूर्व पनि वडा नं. १० र वडा नं. ७ को केही भू–भाग छ । हालसम्म ती वडाका बासिन्दाले आफ्नै वडाभित्र आवतजावत गर्नसमेत पूर्व–पश्चिम राजमार्गमा रहेको कनकाई पूलको प्रयोग गर्नुपर्ने बाध्यता छ । स्थानीयका अनुसार वडा नं. ७ का बासिन्दाले आफ्नो वडाको अर्काे भाग पुग्न करिब सात किलोमिटर उत्तरतर्फ यात्रा गरेर कनकाई पूल पार गरी जानुपर्ने अवस्था छ । तर अब झोलुङ्गे पूल निर्माण सम्पन्न भएपछि यो बाध्यात्मक परिस्थिति अन्त्य हुने विश्वास लिइएको उनको भनाई छ ।
निर्माण सम्पन्न हुन लागेसँगै स्थानीय बासिन्दाको वर्षाैंदेखिको आवतजावत समस्या समाधान हुने अपेक्षा गरिएको छ । पूल निर्माण सम्पन्न भएपछि चन्द्रडाँगी क्षेत्रबाट सिधै लालपानी जोडिनेछ ।
पूल निर्माणसँगै लालपानी, ट्याक्रा लगायत माईपूर्वका बासिन्दालाई नगरपालिका कार्यालय तथा बजार क्षेत्रसम्म आउन–जान सहज हुने नगरपालिकाका प्रमुख मेगाहाङ थोप्रा (रोशन)ले जानकारी दिए ।
स्थानीयस्तरमा सामाजिक, आर्थिक तथा प्रशासनिक गतिविधि सञ्चालन गर्न पनि पूल महत्वपूर्ण पूर्वाधारका रूपमा स्थापित हुने अपेक्षा गरिएको छ ।
नगरप्रमुख थोप्राले नगर क्षेत्र हेर्दा सहज देखिए पनि भौगोलिक अवस्था र बीचमा बग्ने ठूलो नदीका कारण विकास तथा आवतजावतमा चुनौती रहेको बताए । उनका अनुसार ठूलो नदीमाथि पूल निर्माण गर्ने काम नगरपालिकाको बजेटबाट सम्भव नभएकाले संघीय सरकारको सहयोगमा यो योजना कार्यान्वयनमा आएको हो । नगरप्रमुख थोप्राले पूलको निर्माण कार्य गुणस्तरीय ढंगले सम्पन्न होस् भन्ने उद्देश्यले नगरपालिकाले पटक–पटक स्थलगत अनुगमन गर्दै आएको पनि बताए ।
पूल निर्माण सम्पन्न भएपछि शिवसताक्षी नगरपालिकाका सबै वडाहरू नगर केन्द्रसँग अझै प्रभावकारी रूपमा जोडिने विश्वास गरिएको छ । यसले स्थानीयको दैनिक जीवन सहज बनाउनुका साथै आर्थिक गतिविधि, शिक्षा, स्वास्थ्य सेवा र प्रशासनिक पहुँचलाई समेत थप सुदृढ बनाउने अपेक्षा गरिएको छ ।
