कमल / गुडिरहेको स्कारपियोका चालकले अकस्मात विस्तारै गाडी सडकको किनारमा बिसाउँछन । अलि अप्ठ्यारो भएको संकेत गर्दै बेहोस हुन्छन । हत्तपत्त उनलाई अस्पताल लगिन्छ तर चिकित्सकहरुले तत्कालै मृत घोषणा गर्छन । पढ्दा वा सुन्दा कुनै फिल्मको कहानी जस्तो लाग्ने यो घट्ना हिजो बिहिबार साँझ साढे ६ बजेको हो ।
झापाको कमल गाउँपालिका–५ सितापुरीचोकस्थित पूर्व–पश्चिम राजमार्गमा बिहीबार साँझ करिब ६ः३० बजे बिर्तामोडबाट मोरङको पथरीतर्फ जाँदै गरेको प्रदेश नं. १–०४–००१ च ००८० नम्बरको स्कारपियोका चालक पथरी नगरपालिका–९ का ४५ वर्षीय योगेश धिमाल गाडी चलाउँदै गर्दा अचानक असहज महसुस गर्दै बेहोस भएका थिए ।
अवस्था बिग्रँदै गएपछि उनले सजगतापूर्वक गाडी सडक किनारामा रोकेका थिए ।गाडीमा सवार यात्रुहरुले पटक–पटक उनलाई बोलाए तर उनी बोलेनन् । तत्कालै स्थानीयको सहयोगमा उनलाई तत्काल दमकस्थित निम्स अस्पताल लगियो ।
एकै छिनमा चिकित्सकहरुले उनलाई मृत घोषणा गरेका इलाका प्रहरी कार्यालय दमकले जनाएको छ । मृतकको शव पोस्टमार्टमका लागि मोरङको उर्लाबारीस्थित मदन भण्डारी अस्पताल तथा ट्रमा सेन्टर पठाइएको र थप अनुसन्धान भइरहेको प्रहरीले जनाएको छ । प्रदेश खबरबाट
