दमक/ मन्टेश्वरी बिधिबाट पठनपाठन सञ्चालन गर्दै आएको दमक १ मा सञ्चालित कर्नर स्टोन फाउण्डेशनले बार्षिक साँस्कृतिक कार्यक्रम सम्पन्न गरेको छ । मातृभुमी पार्टी प्यालेसमा बिद्यालयका निर्देशक युवराज गजमेरको अध्यक्षतामा शुक्रबार भएको सो कार्यक्रममा बिद्यार्थीहरुले परम्परागत साँस्कृतिक पोशाकमा सज्जिएर नृत्य , गीत आदि प्रस्तुत गरेका थिए ।
बिद्यालयले बालबालिकाहरुमा औपचारिक शिक्षासँगै अतिरिक्त क्रियाकलापहरु सञ्चालन गर्दै कला प्रतिभाको उजागर गर्ने र उनीहरुमा अन्तर्निहित प्रभिाको बिकास गराउने उद्धेश्यले सो कार्यक्रम गरिएको निर्देशक गजमेरले जानकारी दिए । अभिभावकहरुको उल्लेखीय उपस्थितीबीच बालबालिकाहरुले उल्लासपूर्वक कला, प्रतिभा प्रस्तुत गरेका हुन् ।
हामीले बालबालिकालाई विभिन्न जातजातीका परम्परागत भेषभुषामा सजाएर आफ्नो कला प्रस्तुत गर्ने अवसर दिएका हौं, यसले उनीहरुमा जातजातीका परम्परागत साँस्कृतिक पक्षहरुका बिषयमा पनि अतिरिक्त ज्ञान बढाएको छ भने आफूमा रहेको गायन र नृत्य कलाको बिकासमा पनि टेवा पुगेको छ– निर्देशक गजमेरले भने ।
