दमक/ झापाको झापा गाउँपालिकामा आधारभूत अस्पताल उदघाटन गरिएको छ ।
सो पालिकाको वडा नं ३ टाघनडुब्बामा दाता परिवारले उपलब्ध गराएको एक बिगाहा बढी क्षेत्रफल भित्र निर्मित अस्पतालको बुधबार उदघाटन गरिएको हो ।
अस्पताल उदघाटनका अवसरमा अस्पताल निर्माणका लागि आवश्यक जग्गा उपलब्ध गराउने दाता परिवारलाई सम्मान गरिनुका साथै जग्गादाताको अर्धकदको शालिक समेत अनावरण गरिएको छ ।
गाउँपालिकाकी कार्यवाहक अध्यक्ष अन्जुदेवी थपलियाले अस्पतालको उदघाटन गरेकी हुन् । १० वेड क्षमताको सो आधारभूत अस्पताल बनाउन झापा गाउँपालिका वडा नं ३ फुलगाँछीका समाजसेवी स्व। तारानिधि तिवारी र उनकी धर्मपत्नी विशेश्वरी तिवारीले करोडौ रुपैयाँ पर्ने १ विगाह १ कठ्टा १५ धुर जग्गा निःशुल्क रुपमा दान दिएका थिए ।
जग्गादाता परिवारलाई झापा गाउँपालिकाले दोसल्ला ओढाएर सम्मान–पत्रसहित सम्मान गरेको छ ।
त्यस्तै आधारभूत अस्पताल बनाउनको लागि जग्गा व्यवस्थापन गर्ने समितिका पदाधिकारीहरुलाई पनि सम्मान गरिएको थियो । जग्गादाता स्व। तारानिधि तिवारीको अर्धकदको शालिक अस्पतालको परिसरमा स्थापना गरिएको छ ।
अस्पताल निर्माण गर्न संघीय सरकारको सहयोग ४ करोड ८९ लाख तथा झापा गाउँपालिकाको २ करोड ४४ लाख ६२ हजार ७ सय ७७ रुपैयाँ गरी कुल ७ करोड ३३ लाख ६२ हजार ७ सय ७७ रुपैयाँ खर्च भएको प्रमुख प्रशासकीय अधिकृत जनार्दन निरौलाले बताए ।
उदघाटन कार्यक्रममा कार्यवाहक अध्यक्ष थपलियाले अब सामान्य उपचारका लागि यस क्षेत्रका नागरिकहरुले टाढा जानुपर्ने बाध्यता हट्ने विश्वास व्यक्त गरिन् । अस्पतालबाट स्थानीयले सहज , सुलभ र गुणस्तरीय स्वास्थ्य सेवा पाउने र आगामी दिनमा थप विशेषज्ञ सेवा उपलब्ध गराउने समेत प्रतिबद्धता जनाइन् ।
हाल अस्पतालबाट सेवाग्राहीहरुले एमवीवीएस डाक्टरवाट ओपीडी सेवा , ल्याव सेवा , एक्सरे , गर्भवती महिलाको लागि भिडियो एक्सरे , औषधी वितरण , प्रसूति सेवा र २४ घण्टा वर्थिङ्ग सेवा उपलव्ध हुने जनाइएको छ ।
वडा नंं ३ का अध्यक्ष सुभाषलाल गणेशको अध्यक्षतामा भएको उदघाटन कार्यक्रममा कार्यवाहक अध्यक्ष थपलिया, वडा नं १ का अध्यक्ष राजकुमार यादव , वडा नं ७ का सखिचन्द्र ठाकुर , पूर्ववडाध्यक्ष ३ का मोतीलाल गणेश , दाता परिवारका तर्फबाट बसुदा कँडरिया, जेष्ठ नागरिक संघका सचिव लक्ष्मी उप्रेती , जयनारायण शाह , शिक्षक महासंघ झापा गाउँपालिका अध्यक्ष जगन्नाथ राजवंशी , नेकपा एमाले झापा गाउँ कमिटी अध्यक्ष मोहन घिमिरे , टंक विश्वकर्मा र लगायतले शुभकामना मन्तव्य राखेका थिए ।
