राजु निरौला
दमक/झापाको दमकस्थित सरकारी स्वामित्वको दमक अस्पतालमा भएको आगलागीको घटनाबारे छानबिन तथा अनुसन्धान गर्न बनेको समितिले बुझाएको प्रतिवेदन आज ( बिहिबार) सार्वजनिक भएको छ ।
सो अस्पतालमा गत कार्तिक २९ गते दिउँसो २.३० बजे अचानक आगलागी भएको थियो । सो घटनाका बिषयमा विस्तृत अध्ययन अनुसन्धान गरी प्रतिवेदन पेश गर्न दमक नगरपालिकाले दमक १० का वडाध्यक्ष बोधराज न्यौपानेको संयोजकत्वमा स्थानीय प्रशासन, उद्योग वाणिज्य संघ, बिद्युत , औषधि सम्बन्धिका जानकार तथा अनुभवीहरु सम्मिलित छानबिन समिति गठन गरेको थियो । समितिले गरेको छानबिनको निष्कर्षसहित
दमक अस्पताल सञ्चालक समितिले आज संक्षिप्त कार्यक्रमबीच सो सम्बन्धि घटनाको प्रतिवेदन सार्वजनिक गरेको हो ।
कार्यक्रममा अस्पताल सञ्चालक समिति अध्यक्ष समेत रहेकी नगर उपप्रमुख गीता अधिकारीले अस्पताल भवनमा आगलागी हुनुका सम्भावित कारणहरु मध्ये अस्पताल भवनमा अर्थिङ नहुनुलाई औंल्याएको बताइन । अर्थिङ नभएको अवस्थामा बिद्युत भोल्टेज नियन्त्रणका लागि स्टेव्लाइजर समेत नभएका कारण अचानक बिद्युतीय कारणबाट सो घटना हुन पुगेको पनि औंल्याइएको छ । त्यस्तै एमसीबीको क्षमतालाई पनि कारणका रुपमा लिइएको छ ।
सो घटनाको छानबिन गर्न बनेको समितिका अतिरिक्त सम्बद्ध सबै पक्षलाई उपप्रमुख अधिकारीले धन्यवाद दिइन ।
सार्वजनिक भएको प्रतिवेदन अनुसार आगलागीमा करिब ६० लाख बराबरको औषधि तथा औषधिजन्य विभिन्न सामग्रीहरु परेकोमा करिब २८ लाख ७८ हजार मुल्यको सामाग्री पुनः प्रयोगमा ल्याउन नसकिने गरि नष्ट भएको उल्लेख गरिएको छ । आगलागीमा सर्जिकल सामग्री, बीमा सुविधा अन्तर्गत प्रदान गरिने औषधि, निशुल्क प्रदान गरिने औषधि, विभिन्न इलेक्ट्रीकल्स सामाग्रीहरु, कोभिड १९ सम्बन्धिका सामग्रीहरु लगायत क्षति भएको पनि प्रतिवेदनमा जनाइएको छ । प्रतिवेदनमा आगामी त्यस किसिमको जोखिम हुन नदिन अस्पतालमा विभिन्न सामाग्रीहरुको अलग अलग ठाउँमा व्यवस्थापन तथा भण्डारण गर्ने व्यवस्था मिलाउन र प्राविधिक रुपमा जोखिममुक्त संरचना निर्माण गरिनुपर्ने सुझाव समेत दिइएको छ ।
सो कार्यक्रममा प्रदेश सभा सदस्य अर्जुन राई, प्रधानमन्त्री केपी शर्मा ओलीका सचिवालय सदस्य होम बहादुर थापासहित स्थानीय राजनीतिक दलका प्रतिनिधिहरुको पनि उपस्थिति रहेको थियो । कार्यक्रमको सञ्चालन नगरपालिकाका स्वास्थ्य निरिक्षक बद्री बरालले गरेका थिए ।
