दमक/ शिवसताक्षी नगरपालिकामा सञ्चालित मेयर कप खेलकुद प्रतियोगिता अन्तर्गत कराँते , भलिबल र ब्याडमिन्टन प्रतियोगिता अन्तर्गतको फाइनल खेल सम्पन्न भएका छन् । कराँते विधामा वडा नं ८ पहिलो बनेको छ ।
प्रतियोगितामा सहभागी अन्य वडाहरुलाई पछि पार्दै वडा नं ८ ले पाँच स्वर्ण, पाँच रजत र दुई काँस्य पदक जितेर पहिलो स्थान ओगटन सफल भएको हो ।
शनिबार सम्पन्न कराँते तर्फको सो प्रतियोगितामा पाँच स्वर्ण, चार रजत र ६ काँस्यसहित वडा नं. १० दोश्रो बनेको छ भने एक स्वर्ण, दुई रजत र ११ काँस्यसहित वडा नं. ११ तृतीय स्थान हासिल गर्न सफल भएको नगर खेलकुद बिकास समितिका संयोजक सुरज रिङगालुङ राईले जानकारी दिए ।
प्रतियोगिताका उत्कृष्ट ‘राइजिङ प्लेयर’ पुरुषतर्फ वडा नं. १ का दीप लिम्बू र महिलातर्फ वडा नं. १० की समीक्षा लिम्बू घोषित भए । साथै ‘बेस्ट फाइटर’ महिलातर्फ वडा नं. ८ की सृजना तामाङ र पुरुषतर्फ वडा नं. ८ का राकेश मल्लिक बनेका छन् ।
मेयर कप २०८२ अन्तर्गत भलिबलमा वडा नं ७ पहिलो बनेको छ भने उपविजेता वडा नं ८ बनेको छ । त्यस्तै ब्याडमिन्टन डबल तर्फ वडा नं ९ विजेता बनेको छ भने सिंगल तर्फ वडा नं ११ विजेता बनेको छ । क्रिकेट र फुटबल प्रतियोगिताको फाइनल खेल सोमबार हुनेछ । क्रिकेट खेलको फाइनल शिवगञ्जस्थित जनआदर्श माविको मैदानमा हुनेछ भने फुटबल तर्फको फाइनल र पुरस्कार, मेडल , प्रमाण पत्र वितरणसहित मेयरकपको समापन दुधे रंगशालामा दिउँसो २ बजेदेखि हुने आयोजक शिवसताक्षी नगर खेलकुद बिकास संयोजक सुरज राईले जानकारी दिए ।
