दमक/ सामाजिक सेवामा क्रियाशील संस्था असहाय मानव सेवा समाज दमकको छैटौँ साधारण सभा तथा तेस्रो अधिवेशन शनिबार सम्पन्न भएको छ ।
दमक ८ मा सम्पन्न सो अधिवेशनले पुनम रिजाल (प्रेमकुमारी)को अध्यक्षतामा आगामी तीन बर्षे कार्यकालका लागि संस्थाको नयाँ कार्यसमितिको नेतृत्व चयन गरेको छ ।
उपाध्यक्षमा निर्मला थापा, सचिवमा कृष्ण भट्टराई, सह सचिवमा अमृत बिष्ट र कोषाध्यक्षमा भुमी निरौला निर्विरोध चयन भएका छन् । त्यस्तै कार्यसमिति सदस्यहरुमा देवराज दंगाल र श्याम तिम्सिना चयन भएका छन् ।
सो निर्वाचन प्रकृया पुरा गर्न प्राध्यापक रत्न थापाको संयोजकत्वमा शैक्षिक व्यक्तित्वद्धय दुर्गा काफ्ले र ओम खनाल सदस्य रहेको निर्वाचन समितिलाई जिम्मेवारी प्रदान गरिएको थियो ।
दमक ८ का वडाध्यक्ष धर्मप्रसाद दाहाल (दिपेश)को प्रमुख आतिथ्यमा भएको अधिवेशन तथा साधारण सभाको उदघाटन कार्यक्रममा संस्थाकी अध्यक्ष सजु (लोकमाया)बुढाथोकीको अध्यक्षतामा भएको कार्यक्रममा संस्थापक अध्यक्ष चेतना निरौलाको पनि विशेष आतिथ्य रहेको थियो ।
नेपाल रेडक्रस सोसाइटी दमक तदर्थ समिति संयोजक गोमा बुढाथोकी, शैक्षिक तथा सामाजिक व्यक्तित्व दुर्गा खनाल काफ्ले, दमक बाल आश्रमकी मेनुका बुढाथोकी, योगदान राष्ट्रको लागि नामक संस्थाका दमक नगर सचिव गोबिन्दराज कट्टेल, आम्दा स्वास्थ्य बिज्ञान प्रतिष्ठानका शिक्षक लता खनाल लगायतको आतिथ्य रहेको थियो ।
सो अवसरमा ९२ बर्षिया ज्येष्ठ नागरिक गोमादेवी गौतमसहित विभिन्न व्यक्तित्वहरुलाई सम्मान गरिएको थियो ।
