दमक/ माध्यमिक शिक्षा परीक्षा एसईई २०८२ मा इलामका १० पालिका (स्थानीय तह) हरु मध्ये चुलाचुली गाउँपालिकामा सबैभन्दा धेरै उत्तीर्ण प्रतिशत भएका छन् भने माङसेबुङ गाउँपालिका सबैभन्दा कमजोर देखिएको छ ।
चुलाचुली गाउपालिका भित्र रहेका ९ वटा बिद्यालयबाट सहभागी बिध्यार्थीहरु मध्ये ८१.६ प्रतिशत बिद्यार्थीहरु उत्तीर्ण भएका हुन ।
चुलाचुली गाउँपालिका अध्यक्ष राजेन्द्र केरुङ बिद्यार्थी , शिक्षक र अभिभावकहरुको समेत सक्रियताका कारण स्थानीय सरकारले शिक्षामा गरेको लगानीको प्रतिफल सन्तोषजनक आएको प्रतिक्रिया दिए । उनले आगामी दिनमा थप प्रभावकारी ढंगबाट स्थानीय सरकारले शिक्षा क्षेत्रका योजनाहरु अघि सारिने उल्लेख गरे ।
चुलाचुली गाउँपालिकापछि इलाम नगरपालिका उत्तीर्ण प्रतिशतका आधारमा दोश्रो भएको छ । इलाम नगरपालिकाले ८० प्रतिशत बिद्यार्थी उत्तीर्ण गराएको छ ।
त्यस्तै देउमाइ नगरपालिकाले ७३.३३ प्रतिशत, माइ नगरपालिकाले ६८.५० प्रतिशत, सुर्याेदय नगरपालिकाले ६२.८१ प्रतिशत , रोङ गाउँपालिकाले ५९.७१ प्रतिशत, फाकफोकथुम गाउँपालिकाले ४६ प्रतिशत, माइजोगमाइले ४१.७१ प्रतिशत , सन्दकपुरले ३६.८९ प्रतिशत र माङसेबुङ गाउँपालिकाले सबैभन्दा कम ३३.९० प्रतिशत उत्तीर्ण गराएका हुन् ।
