झापा/ नेपाल उद्योग वाणिज्य महासङ्घ, कोशी प्रदेश समितिको नयाँ नेतृत्व चयनका लागि आज निर्वाचन हुँदैछ ।
महासंघको जारी ८औँ प्रदेशसभाले आगामी तीन वर्षे कार्यकालका लागि १४ सदस्यीय नयाँ प्रदेश कार्यसमिति चयन गर्ने छ । निर्वाचन अन्तर्गत आज (आइतबार) राती मतदान शुरु भएको छ ।
यसपटकको निर्वाचनमा वर्तमान अध्यक्ष राजेन्द्र राउत र मोरङ व्यापार सङ्घका अध्यक्ष नवीन रिजाल प्यानलसहित चुनावी मैदानमा उत्रिएका छन् ।
दुवै पक्षले आ–आफ्नो समूहलाई बलियो दाबी गर्दै व्यावसायिक हकहितका एजेन्डा अघि सारेका छन्। । सहमतिको अन्तिम प्रयास असफल भएपछि नयाँ अध्यक्ष चयनका लागि मतदान हुने निश्चित बनेको छ ।
निर्वाचन समितिले मतदान सकिएलगत्तै मतगणना सुरु गरी नयाँ नेतृत्व घोषणा गर्ने जनाएको छ । उद्योगी–व्यवसायीहरू सकेसम्म सर्वसम्मत नेतृत्व चयन होस् भन्ने पक्षमा रहे पनि दुवै पक्ष नेतृत्वको दाबीबाट पछि नहटेपछि मतदान मार्फत प्रतिस्पर्धा हुने अवस्था आएको हो ।
